armontée dinch' nord 1
par minloute le, 04/07/2011cha y est j' su sul' quai du métro gare du nord, là y a toudis un momint d' flot'mint, ché gins qui savent té pas si i doivent printe à droite ou à gauche pour arriver du qui a les grandes lines sncf
cha y est les derniers portiques i sont passés, j' su cor in sous sol , du qui a les premiers marchands d' journeaux et pi ché toilettes du métro
acoutez à chaque coup que j' passe , est ce que j' me fais d'zidées j vo toudis qui a quéqu un qui attint à l' intrée et j' leur trouffe un air lubrique .............
ché là niveau -1 que se croisent ché gins qui vont printe le RER et ceux qui armontent cor un niveau pour arriver du qui a les départs des grantes lignes
cha y est , dernier escayier mécanique, et in abouti au niveau zéro
comme d' habitute ché plein d' monte , certains aux ziux rivés such' tableau du que s'égrainent les destinations , tout cha pour vire l'premier l affectation du quai , pour pouvoir s' précipiter pour printe ch' plache, à acroire qui savent te pas que ché des places avec réservation d'puis toudis dins ché TGV
comme d' habitute i fait pas trop caud dins la gare, in intind des annonces in anglais pour ché thalys qui vont desservir les gares d' Londres
des annonces in flamand ou hollandais si in préfére, pour annoncer du qui partent ché trains pour "amsteldame" comme i dissent ...........
mais aussi des annonces concernant la destination de TER qui vont bintot partir arjointe les gares picardes .......
y a ché gins qui ravissent ch' tableau d' départ patiemmint, y a toudis des gins qui surgissent d' nulle part , billet à la main , vers ch' quai du que résonne djà l' sonnerie d un imminent départ
mi j a ker , eune fo min billet composté, arperer l' TGV par lequel j' va partir , ché plutot facile après 8h10 quand que ch'quai du dernier train en direction de Lille Flandres est affiché ...........
là comme eune volée d' moniaux , t as l impression que l' gare as' vide à moitié, et que tous ché gins , hypnotisés, i s' rintent d un seul coup, dans l' meme effort vers l' meme voie d 'embarquemint ..............
mi j a ker raviser ché gins, y a ché pressés, prets dins les startinebloques pour s élancer vers leu wagons, y a les inquiets qui vont raviser plusieurs coups l' numéro del plache et l' numéro del voiture .......
pi a d' zexantriques, j in voyo un avec pour mi un furet en laisse .........
sans parler d' jones files habillées du genre gothique, j' sais pas si in peut appeler cor cha du rouche à leves, mi j' diro plutot du noir à leves ......
avec un blouson in cuir noir, eune minijupe noire, des bottes noires, mais su des collants noirs qui sont déchirés , savez comme si ale avo qué eune paire d' coups sul' daine ........
j' parle pas d' ché garchons , tiete rasée, mais avec eune grande mèche sul' devant
j' em' dijo in mimeme, cor heureux que j a pas eu d' zinfants comme cha ..............
ché pratique aussi d un certain coté, té lé mets dinch' gardin , té sur que t auras pu d' moniaux pour minger ché graines au sol ou ché quériches dins z'zarpes
après et ché récurent in vo cha régulier'mint, pour mi ché un "genre" , ché jones décontractés qui portent un capio in paille
si té savo fiu, chéto djà à la mote pour frimer dans les années 80
aprés t as ché étrangers, ou j' diro plutot ché zétrangères, bon t as ché suédoisses du qui a rin à j'ter, pi quequ' fo y a des zaustraliennes, que t'eut' dit qu ale zont du bin minger al' cantine d' puis qu ale zétotent tchiotes
y a bin sur toudis eune bante d' japonais, au visage glabre, que teu't deminte si i sont pas malates, nan i font pas del jaunisse, ché d'zaziatiques ...........
ah té vo tem' rassure ........
par conte mi ché pas ceux là qui m' font l' plus peur, sincér'mint, mi ché les militaires ....
comme dijo Coluche "vla la milice qui passe, armée jusqu' aux dents , prète à bondir"
j imagine si y avo un attentat, ou meme un début d' bagarre, mais à quoi qui servirotent avec leu famasse ? ah si à faire un bio tir aux pigeons dans la foule
pi faut les vire , cha roule del' mécanique, l'regard lointain, du coté de sidi ben abes, ou de tataouine ......
ch' train d' 8h22 l' samedi matin, ché fait pour énerver ché gins, i mettent ché numéros d' voies des autes trains, et chti chi , ché juste au dernier momint .... vers 8h15
et alors là, eune vague , eune marée humaine, un vrai caravanesérail i s' met in route, tout l' monte i arprind sin sac à dos, ses valisses, sin chariot, ses cartons, et dans un meme élan, tout l' monte i s' précipite vers l' bon numéro d' quai ..........