armontée dinch' nord 5
par minloute le, 05/07/2011nous vlà à Arras, mi j a jamais été attiré par chte ville, bin différente du bassin minier
ché sur que les 2 places sont superpes, sans quo , ché d' eune tristesse............
mais bon, ché pas la peine d' s éterniser ..... y a djà pas mal d' gins qui sont déchindus ichi, ch'train i arpart douch'mint
su les cotés comme dins pas mal d' gares, y a des buddléias, savez in appelle cha des arbres à papillon qui ont poussé, et s' sont r'semencés quite à former des tchiots bosquets, au pied des terre pleins
vinguette j' me dis, à vire qui dracho,mi qui s'su v'nu avec eune tchiote polaire sul' dos, j' va rigoler .....
l' train i sort d' Arras, y a comme souvint dins ché lieux là, eune série d' entrepots impersonnels l' long d' la voie ferrée
pi aprés ché la campane, meme campane que depuis l' sortie del banlieue , jusqu à c' qu in vo ché premiers terrils, et là mes gins ché pu du tout parel ..........
là, avec l' line d' chemin d' fer in va suive en partie ch' bassin houiller, in vo au loin ché terrils jumeaux d' loos , in devine ché lines ininterrompues d' toitures pareles : ché corons ........
là in sait pas commint qu in pourro l' expliquer, on arvit .....et pourtant vous m' direz , à part ché terrils et ché corons ché pratiqu'mint l' meme paysache qu auparavant.........
nous in auro invie d'dire , vous vous voyez ché terrils comme des "anomalies" , comme un tas j allo dire d' "saloperies" , vous parleriez plutot d' "crassier" que de "terril"
ché sur, cha s' explique pas, nous ché terrils, ché corons, et dinch' temps les chevalets, chéto not' quotidien
d' partout qu in raviso chéto les terrils ou les corons, in parlo et in vivo "terrils ou corons" .............
cha y est in arriffe à Lens, fait pas bio, mais ché rin, cor pas mal d' montées et d'déchintes dinch' train
on ardémarre tout douch'mint, et j' me dis que par ichi chéto l' pays à Marie Claire et que ché cor l' pays à Christian de Liévin .....................
in apercoit un peu Lorette, pi l' antenne d' Bouvignies mais tout juste vu que l' ciel y est bas
in longe Noeux et là in s in va vers Béthune, là in quitte l' bassin houiller
in est djà bin moins nombreux dinch' train , et là y a eune annonce avant d arriver à la gare chéto du ginre " faites attintion que vu les conditions atmosphèriques , l' quai i est glissant "
nous in dit rin, pi y a eune dame qu ale deminte à sin mari quo qui viennent d' dire et li i dit "i viennent d' dire qui a du verglas such' quai"
là tout l' monte y a souri
arrivée à Béthune, tout l' monte i s engouffre dins l' escayer qui permet d atteinte ch' couloir souterrain pour armonter d' l aute coté des voies, sul' coté d' la gare
bin sur t as toudis des gins campés in haut d' l'escayer à attinte quéqu un quite à géner l' progression des gins qui viennent d arriver , mais i s in rinte meme pas compte
j arrive sul' parvis d' la gare, du qui a ché fontaines et l'estatue de Francois Mitterand, pour vire passer "la bulle" direction bruay
"la bulle" ché l'line d' transport qui relie béthune à bruay, ché un bus toutes les 20 mineutes en semaine, j' me dis que j a pu qu à printe mon mal en patience et pi attinte
et comme tout bon "gaulois", j' me d'minte si chéto l' train qui éto in r'tard ou ch' bus in avinche, in tout cas y avo pas synchronisation ch' coup chi
j'em' dirige vers l' abri d' bus , y a djà des gins qui attintent mais chti qui va à barlin
au bout d' quequ'mineutes y a eune dame qu ale deminte ch' bus pour bruay si y a passé, mi j' me fais un plaiji d' li dire avec min plus bio patois, ou plutot min plus bio accent , que " bin nan, y a passé y a chinq mineutes , asteure faudra cor attinte 15 mineutes"
l' dame al' m armercie sans sourciller, ché que j a réussi min "oral" d' patois, ale a pas vu intinte que j éto pu del 'région, ou plutot que j y habite pu