minche ! et les qualités des légueumes
par minloute le, 02/08/2011savez la vie ché souvint qu un rhabillache,la roue ale tourne, in éto cor hier ou avant hier al' tchiote plache autour del tape, in a été ensuite ch' maite al' mason et in trono in bout d' tape
(quand que j' dis qu in éto les maites.......chéto sans compter l' traval d' sape qu ale font ché femmes tout au long del vie à nous asticoter, à nous faire nous dem'ner pour des broutiles queq' fos )
l' résultat ché simpe à vire , allez dins ché masons d artraite, y a pas grinmint d' hommes, pi savez j' voudro pas et' à leu plache
pasque intourés d' garnoules qui les ravisotent au coin d' leu fauteul roulant , l' dintier pret à morte, vous m' direz y a pu grand cosse à morte , mais cha n impeche pas, comme diro l aute , ché l intention qui compte ...
mais arvénons à nos moutons, in arvient en arriere, du temps qu in occupo l' tchiote plache autour del tape, plus tard in a été in bout d' tape ,pasqu in éto ché maites al' mason,nos zinfants sont v'nus rimplir ché plaches autour del tape quand qu in déjeuno ou qu in dino
et si vous les acoutez, et si vos parints vous avotent acouté, in auro surtout mingé des frites, pi des frites, pi des frites
donc y a fallu , ou in tout cas chéto comme cha al' mason, trouver pour chaque légueume, eune phrase qu ale réseumo les bienfaits qu in auro à in minger
chéto m' mère qu ale le faijo , mais cor rar'mint, autant min père , chéto sin ch' val d' batale, mais as' deminder si chéto pas plutot du comique d' répétition qui avo ker faire ...
voulez des exempes ? j' va vous in donner
m' mère ale apporto sul' tape un légueume ou un fruit que j avo pas trop ker ou que j' saquo min nez rin qu in voyant ch' plat arriver
j avo dro et souvint d'la part dem' mère "té dit cha , mais t as pas gouté" ou "mais tin minche d habitute" etc etc
min père à croire qui auro pu faire carriere dans eune agence d' publicité i avo trouver ses phrases cultes, qui ont servi pour mes freres et soeurs qui m' ont précédé et qui plus de 11 ans plus tard i avo armis au gout du jur
chéto des slogans, quequ' fos pas facile à comprinte pour un éfant d' 8 ans, et parfos au lieu d' m' aider à minger ch' légueume, cha provoquo eune réticence ou un doute supplémentaire ......
exempe
les épinards cha chéto l' plus facile , vu qu al' télé in voyo Popeye le marin tous les diminches au cours D' UN seul dessin animé et pas comme asteure qui a meme des chaines qui diffussent pu qu' cha
là min père i dijo té va et' fort comme Popeye ...va tin vire que j avo invie d' li dire
j avo que l invie vu qui avo des mains espécial'mint bin faites, à mon grand regret, pour donner des cliques, savez des mains bin épaisses, bin grantes .... cha pique cor pour vous dire ...
après yavo ché betteraffes, et là j'vous avoue que cha m' troublo quand que min père im' dijo que j allo faire pipi rouche, pour mi chéto des cacoules et d' vire un peu plus tard qui avo raison, chéto troublant
chéto pas fait nan plus pour m'rassurer et m incourager à in minger , pourtant asteure j in minche souvint et avec plaiji
in continue avec ché carottes, là parel chéto toudis l' meme phrasse, cha commincho par "cha rind intelligent" , après " ché bon pour tes gampes té va courir vite comme ché lapins" et cha s' termino par "cha rint les fesses roses" , c' qui faijo lever les ziux au ciel dem' mère, mais qui faijo bin rigoler m' grand mère et avec du recul , ch en est meme étonnant ..................
ché péteux, là chéto l' coté "musicien" qui éto mis en avant, là cha plaijo pas trop am' grand mère quand que min père i m'prometto que j allo faire des gros prouts dins m'maronne si j' finisso m' n assiette
chéto rigolo, mais m a arrivé un tour un coup, j a pété tout d' suite aprés, mi j' pinso qui zaller in rigoler, bin nan, cha a été qu un tonnerre d' réprimantes que j a pris sul' coin d ' em' n eule...
ché vous dire commint ché compliqué les zadultes, cha rigole d' vos bétisses juste avint ,et là d un coup y juent pu et y s'rotent prèt à vous punir in plus
les concombes, "l avantache ché qu' té va in minger deux coups dins l' journée" l' premier coup in mingeant, l' second quand que cha va t armonter ......
les salsifis , "ah t as pas connu la guerre ti, in in auro mingé ach' momint là sul' tiete d' un pouilleux" , s in suivo eune litanie sur la jeunesse d asteure qui respecte rin, qui conno pas la valeur des chosses
cha vous rappelle rin, in fait cor parel asteure.......
ché champignons in avo dro à l imitation de louis de funes dans le film du qui juo l' role d un braconnier, i dijo" qui veut des champipi des champipi, des champignons"
cha chéto les premiers types d 'argumints ...
et aprés veno l' argumint qui tue , que pour mi cha m' toucho pas plus qu' cha "ché des légueumes du gardin"
j' diro meme que chéto quéquosse qui m' faijo cor plus tiquer ,pasque avant l' temps béni d asteure du que dans eune salate que t acate asteure au super marché , té trouvera pu inter ché feules , un résidu d' terre
ou cor plus "appétissant" un pauv' ver bin gras que ché juste au dernier momint, au momint qui est sul' bout del fourchette et qu' zallez l infourner que vous l' voyez arplié dans l' pli del feule d' salate ............
pi mi j' savo dins quoi cha vivo les légueumes du gardin, eh j y allo d' temps in temps, et j' les voyo ché limaces , ché zescargots , et ché viers d' terre .......
j' voyo bin l' cul des salates qu' min père i avo coupé, j' voyo bin ses mains pleines d' terre et là in m'metto en avant que chéto eune qualité que ché légueumes i viennent du gardin ...
mi j' préféro au pire, ché légueumes d' monsieur Leroy, des bios légueumes , mais cha valo pas les légueumes in boite, là in éto au moins sur d' pas trouver del terre ou des viers dins ché légueumes
mais mi que que voulez mi j' préféro les frites et les pétotes...
alors aprés l argumint "ché bon pour ta santé", si j in mingeo pas, min père i passo au plan B, chéto menace et mise à exécution si j' me dépécho pas d avaler m' bouchée d ' haricots verts que parait il, euj' rumino d'puis un quart d' heures dins m' bouque ............
autour d' la tape, avec les années, tout douch'mint, un , pi deusse, pi tro pi tous ché zéfants y zont quitté l'tape
in s a tous artrouvé plus ou moins seul avec grand mère (ché l' momint l' plus pénipe, j' trouffe, in méritero pas cha ...)
cor heureux que d' temps in temps, y zarviennent avec leu zinfants à eux
et quand qui sont plus grands, in a tous jué au babisitter , meme si chéto loin d ete désagréape
mais in devro artrouver la meme réticence devant les légueumes comme nous in a connu ...
bin nan , pasque là ché ché grand parints, alors meme que cha arriffe qu in les zenmene minger "des cochoneries" à mon maquedonalde, ou que pour les aider à minger des legueumes in arrosse tout cha d' quetecheupe ....
vraimint meme ché grands parints i zont cangé.....
bin ya rin a rajouter , sauf qu'em mère al dijot toudis quand in trouvot un asticot din un fruit "ché pas graf ché d'el viante sans ticquet"
pour chés légueumes d'ech'gardin , ché vrai qu'chétot du naturel , sauf qu'in y vidot les chiottes , in etot pas malate pour cha
hier em femme al a arrachée un pied' d'patate , el seul , ya arpoussé din ch'machin du qu'in jette tous chés plures pour faire du composte , bin j'sé mingé ch'midi , y étotes super bonnes , meilleurs qu'chel à kiki lévesano , et din chés prones d'ech'gardin yavot ed' z'asticots