noces d'or à Annezin

Aujourd'hui ej peux aller à l'école sans tablier , j'ai mis un tiot corsache bleu ciel avec des manches ballons et einne jupe plissée bleu marine avec des bretelles croisées, à 11h et d'mie al sortie des classes ej m'in vas à Annezin avec mes parints et min frére .

Cha y'é in est dinch'l'autobus , ej sus assisse à coté d'eul fenette avec min pére et pis em mére al est derriére avec min frére

- Regarde devant ma belle sinon té vas ett' malatt' qui dit Papa, cha saute in vient ed passer such chemin d'fer ed Lapugnoy, un peu plus loin Labeuvriére , Chocques , cha tourne , y'a des viraches mais cha va j'ai pas core vomi, Annezin , ouff, cha yé in deschind , y'étot temps ej sus toute verte comme i dit min frére in rigolant .
in va marcher un peu jusque chez les grands parents cha va m'faire du bien.

Nous vla arrivés , tiens eull' porte al est tout grantt' ouverte , in rinte , que monde , y'a meme mes 2 pigrettes ed cousines , Grand maman al est pas avec sin tablier et pis ess' louche dinss'main , al est meme bien habillée et grand pére aussi, y'a 2 grandes tappes avec des nappes blanques , ej reste collée am mére , (j'étos miu dinch' l'autobus), min frére i s'assit al tapp , NON NON qu'al dit ma Tante Paula , on ne mange pas tout de suite in l'arsaquant par sin bras sous l'oeil meurtrier d'em mére..

tous in route pour l'églisse, min frére i sert bien fort sin poing bin ouais y'a eu 20 centimes ed maman qui ia dit tout bas "ché pour la quete" , ej sais pas quo qu'iavot compris tout compte fait que quand em mére al y'a pris ess main pour el trimper dinch bénitier , li , y'a laisser ker ché vingt centimes eddins!

Min pére y'é dehors al porte ed l'églisse , ej voudros bien ett' avec li, ouff cha y'é ché fini , in sort tertouss , y'a un photographe qui nous attind , ché Nord Matin equ j'intinds dire , tous in pauss pour einne photo , in rintte tout duchmint, y'a einne camionnette devant l' maison et y'a un gros Monsieur qui apporte des grands plats , ché tout juste si y'arriff à passer al' porte.

ej sus assisse devant ché 2 pigrettes qui s'impressent tout d'suite ed dire am tante qu'ej minche tout ch'pain, ej m'artourne pour vire em manman et je l'vos bien assisse su chaisse cha m'fait tout drole , al maison al est toudis assisse sur un coin d'chaisse, à propos , min frére y'é toudis debout, y'oss pus s'asseoir asteur avec el sérénatt equ' ma tante Paula al y'a fait taleur
cha minche , cha parle fort

Voulez vous danser grand mére ?? voulez valser Grand.pére ?? cha y'é cha cante.. j'in profite pour aller al cuisine , ya einne tiote porte pour aller din l'cour et pis y'a quatre escaliers au cas ou ché 2 pigrettes al raménent leur fraiss, badabom ej les vos déjà dégringoler poussées par une petite main délicate...