1er juin 1964 C.E.P

I fait bon ch'matin, ej viens d'boire un tite goutte ed café , bin ouais hein, ej sus grantt asteur hein , j'ai 14 ans ed pis 8 jours.
Manman al m'a préparée m' belle ropp' , m'ropp' Picasso comme ej dis , ed toutes les couleurs. Aujourd'hui , ej passe min certificat d'études.

J'imbrasse manman avant d'partir, al a ses yux qui brillent, al va pas braire quand-meme
ej passe par l'rue d'Abbeville, ché plus long, jé l'sais, mais ej passe edvint s'maison à Serge comme cha , j'in sus amoureuss mais, li, il sait pas et pis ed toute façon , i va avec einne qu'al a 1 an d'moins qu'mi, mais qu'al parait plus grante equ' mi ! meme qui vont ach'gardin publique pour s'imbrasser..

Ya du monte din l'cour ed l'école, y'a meme des filles ed Quénehem et pis d'Calonne aussi, ej cache après mes copines, ej vos Michéle , el fille d'ech coiffeur, hier ej l'ai vue qu'al allot au cinéma, alors que mi à 7h et d'mi j'étos déjà din min lit.

In fait l'appel, bon in m'a mis din m'classe, ché dèjà cha, ej sus moins traumatisée comme cha.
cha comminche par einne dictée "le coucher des poules" j'ai ker l'dictée, ej cros qu'j'ai fait 0 faute, in ramasse ché copies.

Asteur ché un probléme avec un sincier qui veut rintourer s'pature avec du fil de fer barbelé, combien qui dot n'acater si s' pature al fait 10m ed long sur 2o m ed larche .. y'aurot miu fait ed faire pousser des arpes, mais bon cha ché m'n'avis

Aprés in nous deminte du qu'la Seine al print s'source , commint qu'al s'appelle el chaine des montagnes qui divise la France ed l'Italie.. allez un tit peu d'science, un tit peu d'histoire ed France et nous vla arrivés à midi et d'mi, l'heure d'artourner ass'baraque pour minger, maman al m'a core arfait un biftek ed bidet, al me n'a fait minger tout l'semaine, meme que min pére i y'a dit "Si al a pas sin certificat, al pourra toudis trainer ch'corbillard à mon Foulon!"

L'après midi se passe bien, j'ai pas eu couture, j'avos peur ed cha, Nan, j'ai eu dessin, j'ai du dessiner un coureur cycliste, ej y'ai fait einne sonnette su sin vélo, ej savos pas qui n'avottent poin d'sonnette ché coureurs, aprés in m'a d'mindé quo qu'ej voulos canter "soit la Marseillaise , soit la truite de Schubert". j'ai canté la marseillaisse. un tiot peu d'lecture aussi et cha y'é ché fini!!
In attind ché résultats din l'cour..

Y'è bétot 6h, les vla, les vla ché résultats..
Première du Canton : Maryse Ma... ché einne d'em classe, ej sus continte, ché noms i défilent, j'ai du mau à min vinte, ej vas quand meme pas devnir jone fille asteur , bin ouais ej sus core tite fille mi, pas comme l'aute la qui va avec Serge...)

Myriam P.....
Cha yé i l'ont dit, i l'ont dit, ej sus archue , ej sus archue.
ej sors d'eul cour à toute vitesse pour m'acater un tiot drapieau et einne cocarde al camionnette d'vint l'école. Ché pas Manman qu'ej vos la bos ??? si, si, ché elle , ej "galoppe" vers elle in agitant min tiot drapieau , EJ SUS ARCHUE MAN!!!EJ SUS ARCHUE

minloute j'in connos in' qui t'fais concurrence , pour raconter ses souvenirs , cor la j'su in admiration d'vant tout cha , avec tous chés détals ché formidape , chapeau ch'l'italienne