la grante épreuffe d' la dictée 2
par minloute le, 02/10/2011cha y est, in peut pu attinte, ch' portillon d' l école y a été ouverte par ch' "malaipape", chéto ch' directeur
nos mères ale nous dijotent d y aller, d ailleurs ale zétotent djà en train d 'arprinte leux conversations intr' elles et d' printe l' chemin d' la mason pour certaines, pour d ' autes commincher ché courses du matin
nous in avo été lachés dins l' cour d'récrée, ché maites i zétotent so dins leu classes , in voyo quequ fos ché maites qui avotent les salles au rez d' chaussée , celles des CE1, écrire such' tableau vert des mots que les plus tchiots allotent apprinte taleure
mais y avo toudis au moins un instituteux pour faire l' surveillance dins l' cour, avec sin sifflet dins s' main, pret à calmer ché plus énervés ....
yavo comme des places "réservées" , ou plutot in s' argroupo d' abord par classe , pi après par affinité
quequ' zuns sortotent des billes pour juer dins ch' caniveau qui faijo l' tour del cour , d' autes s' courotent après
d' autes comme mi, in éto plutot "coinchés" , as' morte les leves, et meme si yavo l expression " la peur évite pas l' danger" , tout cha in pinsant al' dictée qui allo arriver ch' matin
cha y est , grand coup d' sifflet, chéto la fin d' l ' amus'mint, in s'rindo d'vant l' porte qui donno aux escaliers qui montotent vers nos classes
là in s' aligno, in prenant les distances réglementaires, et eune fos les derniers alignés, ch' maite i crio "bras tendu, fixe ! revenez, fixe !" et quand chéto pas bin, Monsieur Pruvost pour pas l' citer i dijo IN PATOIS "saquez , bande d' briles" c' qui éto sacrilége , et cor plus , quand que ch' parler patois i v'no d' un instituteux .....
cha y est , i a l 'air satisfait d' l' align'mint, ché pas l' cas dech' maite plus loin, faut dire que chéto ché classes du certificat d étutes , ale zétotent un peu plus "dévergondées " qu' nous
nous , ch' maite i avo ouvré les battants del grante porte vitrée, et in montot à l étache, in savo qui allo dire comme à chaque fo, "pas courrir, pas d' croche pieds, pas claquer ché chaussures, sans quo zallez m intinte"
in déposo nos mantiaux sur ché portes mantiaux du couloir, et in rintro dins l' classe , tout in intindant l' sempiternelle phrasse "sans courir" .....
cha y est tout l' monte y est rintré, ch' maite i ferme l' porte, i ravisse si tout l' monte y est présent, i sermonne ché derniers qui trainent pour s assire, ou qui comminchent à babeller intre eux
et là les chosses sérieusses ale vont commincher .........