Angéle et Carolus..
par chtitalienne le, 06/11/2011Ché ch'marché d'quinzaine ch'matin, in est excité min frére et mi, maman al nous a dit qu'in va aller acater 2 ojeons.
in est vite pret et nous vla partis , in a pris un vieux sac à commissions vous vous rapplez ed ché sacs la , i z'étottent faits avec des triangles in cuir cousus intr'eux.
in est d'vant chti qui vind des poules , des lapins , j'artourne em tiete ed l'autt cotè chaque fos qui met un poule din ch'drole d'intonnoir pour eul zigouiller, ech'matin pas d'bol, in dirot que toutes ché femmes ed mineur ont décidé d'faire d'el poule au pot... y'a du sang tout partout.. ej dis meme am'maman que mi si j'étos l'poule ej passro pas m'tiete.
Vous désirez ma jolie tite dame?? (ché un gintil assassin ch'tipe la) vous avez des petites oies? iss' baisse et met un cageot d'vant m'mére.
in n'in cugit 2 , 5 francs pièche et hop dinch'sac , pour arpartir al maison ché min fré qui porte ech'sac,(y'a toudis eu tous les priviléches li, vous vous rapplez d'eul montt qu'ia gagné am'plache, bin il l'a à sin poignet la), on armonte el rue Jean Jaurés , ech traine mes pieds derriére eux , si j'avos porté ch'sac , ej les auros berchées , mi, in marchant.
in est d'vant l'boucherie Bar, " traversez les enfants , on va acheter du paté pour vott pére, j'ai ker aller al boucherie la, in a toudis einne rondelle ed saucisson..
Bon in est arrivé al maison (nan , in a pas eu drot à nott rondelle ch'matin)
Va printt ech'cageot din l'baraque .
ouais m'man
in y met des feulles d'la Voix du Nord ed'dins et ché 2 ojeons..
Cha ché l'mien , cha ché l'mien qui dit min frére (y'a cugit ech plus bieau bien sur) ej va l'appler Carolus, bin l'mien i s'appellera Angéle que j'i dis, in a trimpé du pain din l'ieau et i sont là in train d'minger comme 2 gloutons. Asteur, em mére al a mis einne vielle serviette bleue such'cageot plaché à coté d'el cuisiniére . in intind des tits cris ed plus in plus faibles chuuuut Bonne nuit Angéle , bonne nuit Carolus
la suite au prochain numéro.