chut... té pourro les zintinte ...

quand qu in parto à merlimont in carette, j' me souviens avecl' 403 peugeot break d' couleur grise , j éto particulier'mint armonté

contint d' partir là bo, meme si chéto que pour passer queques jurs à Paques, pour mi Merlimont chéto min western à mi

in juo des heures dins ché dunes , en pleine liberté ...chéto aussi les bons momints d aller su la plage, et meme si au mois d avril mai, l' io ale éto cor plus froite qu in été, j avo ker m' prom'ner le long du littoral

donc in partant, autant min père i metto in route sin moteur à essence , autant mi j' metto in route min moteur à paroles ...

j' liso tous ché panneaux, ché zaffiches publicitaires, j' me souviens surtout , aprés la croix d' grès à Divion en direction d' ourton yavo l' publicité qui m avo bin intringué "vin fou Henri Maire", vin fou, mais alors pourquo ché gins i buvotent te cha, pire commint qu in pouvo laisser ché gins in acater ...

à croire qu ale sortie d' Bruay min père i devo djà in avoir un tchiot peu marre, ou alors mi j' pinse plutot que ché suite à eune d' mes questions ...

min père i m avo dit, in éto in bas d' la rue d' la république direction divion , que ché masons su la gauche chéto la "cité des musiciens"

mi j' avo busié un momint, pasque cha m intrigo, eune cité , des masons du qui avo qu' des musiciens ........

et ché au retour d' merlimont que j avo posé l' question sans malice, que j avo d'mindé des zexplications supplémentaires sul' fameuse cité, vous moquez pas j' devo avoir 7 ou 8 ans .......

min père i m avo dit sérieus'mint que ché masons i zétotent habités par des musiciens, ichi des violonistes, ichi des jueux d' saxophone, par conte yavo pas d' grosse caisse pasque cha , cha faijo trop d' bruit

mi comme ché tchiots oiseaux qui attintent l' bécquée, j a ouvert m' bouque d' admiration ......

d' ailleurs qui dijo min père, si té parlo moins en passant par ichi, té pourro les zintinte

ché pour cha que pendant plusieurs années, j' vous rassure bin avant que j ale faire min service militaire , que quand qu in passo in carette d' vant ch'te cité , j' fermo min clapet

j' fermo min clapet à la fo pour ptete les zintinte juer d' leux instrumints, mais aussi que j éto occupé à essayer de d' viner à travers ché farnietes, l' ombe d un musicien ,révisant eune partition

par conte savez chéto des gins comme z'zautes, mi j' les voyo fuir ché gardins quand que chéto la saison

pour ceux qui cro cor au père noel, lisez pas la suite ....

ouais, pasque j a compris enfin direz vous que cha s appelo l' cité des musiciens pasque chéto des noms d' musiciens qui avotent été données à ché rues....


mais chut.....zetes pas obligé del dire à vo vigins, y a ptete cor des gins qui cro à cha ...........

et i fallot vire el cité des Electriciens , à Noel cha clignoto ed partout ....