ce héros au sourire si doux

nous vla chi à tape, in est en décempe, i fait frod, in est vendredi ou sam'di soir
m' mère ale a fait cor bin fait à minger

in a eu l'soupe, pi aprés ché noules ale castrole, accompagné d' paté et d' saucisson à l ail ...

eune tchiote salate, du fromache avec un bon verre d' vin et là m' mère ale dit " mon diu Léonce , y a cor ché pommes dins l' four" .......

mi j' el savo , mais à ch' t époque là , j' courro pas aprés, alors si j' avo pu éviter d in minger...........

j avo sinti l' vent v'nir, j avo djà ringé d' eune manière bin visipe ,m' serviette dans min rond d' serviette (ch' rond in bo , du que d' su éto gravé min prénom , ouais ouais ouais), j' pousse en avant m' panche et j' dis am' mère en soufflant, "ah pas pour mi M'man, j' in peux pu j' su d' équerre"

m' mère ale culpabiliso tout d' suite, mon diu commint qu ale avo pu faire pour oublier cha ?

min père i li in rajoutto eune couche, "mais ché normal Odette que té tin souvienne pu, té fait trop à minger au soir"
"commint veux tu que j' minge cor eune pomme au four asteure ?"

là, c' qui manque ché l' ton des' voix, autant i éto parti pour raler, in parlant fort, autant au bout del phrasse t intindo pu qu in leger babillache

tout cha pasque, entre l' début et l' fin des ' phrase en busiant bin, i avo trouvé cor un tchiot peu d appétit pour in minger eune

m' mère ale avo djà rintiqué sin drapeau, ale éto prete à débarasser, ché ach' momint là qu' min père i arprenno del voix et d un geste de tribun romain, minquo pu qu' el toge, i tindo sin bras vers l' cuisine en disant am' mère d un air magnanime digne de César "Odette va querre ch' plat" ...

m' mère , telle eune servante barbare aux pieds de l empereur romain, ale parto courbé al' cuisine, pour aller querre ch' plat qui trono au miyeu du four dech' fourneau

min père i faijo d' expret d' garder sin bras in l air et i dijo am' mère qui éto dins l' aute pieche "Odette !!!!!!! te brule pas!!!!!"

alors là dans les chinq secontes qui allotent suive, fallo trainer intre l' arriere cuisine et l' cuisine, y avo m' mère qu ale allo débouler avec ses pieds in canard, ché mains accrochées autour dech' plat intouré d un gros torchon, et ale arrivo l' figure grimaçante vu que ch' plat i éto cor très caud

j a oublié d' vous dire et ché que véridique , et meme si zallez dire que chéto eune mason d' fous, min père i gardo sin bras en l' air et comme si tout en restant assis as' cayelle, vu qui avo s' gampe raite, y gardo toudis sin bras l' vé et i crio "pin pon pin pon " pour que personne i a l' idée saugronue d' aller dins l arriere cuisine et d' querre nez à nez avec m' mère et sin plat, digne d un convoi exceptionnel

là i engueulo m' mère si ale poso ch' plat d' eune façon trop séque sul' porte plat ..... tout d' suite après j' voyo m'mère partir dribbler entre ché cayelles et l' porte bouteles armonté del cave pour accéder ach' buffet pour y printe eune tchiote assiette et eune tchiote cuillère pour min père

tout cha avant qu' min père i choisisse d expret l' pomme au four l' plus carbonisé et qui veule l' mette dans eune assiette que m'mère ale avo interet à avoir gliché d' vant li ......

m' mère djà qu ale culpabiliso pasqu ale avo oublié ché pommes au four, d' vire un plus min père printe l' plus carbonisé

li i dijo" laisse, mi j' su l' pélican, j' em ' sacrifie", tout cha en faisant des grands gestes, in auro dit mussolini as' tribune arranguant les foules ...

et m' mère qu ale li dijo " mais print zin eune aut' Léonce" et min père qui rajoutto d un air malicieux " nan , j' em sacrifie, j' su l' père, ce héros au sourire si doux"

quand qu ale intindo cha ,m'mère ale hausso d un coup les épaules et ale parlo pu à min père ....10 mineutes

mais l' plus rigolo, ché qui a des coups m' mère as' vingeo, oh pas longtimps pasque mi j' gueulo aussi ach' momint là, mais y a des coups ale a du faire expret d' faire tout juste à minger pour un soir, yavo que del soupe, eune tranche d' jambon et del salate d' chicon

min père i tiro sin nez, i d'mindo d eune douce voix "ya aut' cosse à minger" et m'mère ale répondo, "bin Léonce, l' dernier coup té m a dit que t es mingeo d'trop au soir, tes désirs sont des zordres mon chéri" ........

là min père i saquo sin nez, pi i dijo qui fallo pas confonte diète et manger moins, pi l' ton i monto tout douch'mint, et que chéto trop juste c' qui yavo à minger et que l' prochain coup i fallo que m'mère ale fasse à minger ....comme d habitute .....

chéto un sacré spectaque qu in avo dro d' temps en temps

Désormais ej rate jamais un épisode de l' famille "Minloute" mais in vot jamais ch'quien "Ficelle" sous l'tapp , j'in déduis que s'plache al étot al cour.