cha va faire combien?
par minloute le, 01/12/2011pour ché plus anciens, i zont connu l' ancien franc, et j' me souvins mi que m' grand mère ale a toudis compté en anciens francs près d' trinte ans après qu in avo cangé d' valeur d' monnaie..................
cha préto d ailleurs à confusion, combien d' coups quand qu in parlo argent avec m' grand mère , ale poso toudis l' question "en anciens francs ? "...........
"nan Mémé, en nouveau"
"alors cha fait combien ?"
" té rajoute 2 zéros Mémé !"
"alors cha fait combien ?" et là t avo des sommes qui étotent en miyers qui "partotent" en miyons, et là m' grand mère ale soufflo ," cha comminche à faire ker tout cha"
un coup j' sais pu si chéto pour min père ou pour un d' mes frères et soeurs, mais i zont d'mindé des sous à emprunter am' grand mère pour acater ou pour faire ch' complémint pour acater eune carette
là ale avo bin artiré ché 2 zéros, alors qu ale auro du les rajouter, ale a prété ch' t argint mais ale in arveno pas qu eune carette cha puisse couter " des miyons à elle"
ouais ale avo inventé eune nouvelle monnaie "ché francs à mi"
"hein cha fait combien Léonce , en francs à mi"........
rigolez pas mes gins si cha continue comme cha, in in parle d' plus en plus qu in auro ptete 2 monnaies dans un seul pays.........
in gardero l euro pour tout c' qui est échange extérieur et in crééro eune nouvelle monnaie, soit un nouvel euro, soit un nouviau "nouviau franc" ................
verrez dans queques décénnies, y aura un d' vos tchiots enfants qui diront , "teut' souvient Pépé, i s'inmelo toudis entre les anciens et les nouviaux zeuros"....
la route tourne mes gins, in dit toudis que l'histoire ché qu un éternel recomminch'mint .............