tchiot bénitier ....et compagnie

avec ch' crucifix dins l' champe à coucher ou dins l' salle à minger, yavo un aut' truc qu in trouvo dins ché familes les plus croyantes, chéto ch'tiot bénitier

in l' trouvo souvint dans l' champe à coucher, ou comme chez Clara dins l' coin d' l escayer qui monto à l étache

pourquo que té l a mis là Clara ? ché avant d aller m' couquer ,j' fais eune tchiote prière ichi

les 15 dernieres années d' sa vie ale parto pu in pélerinache , mais quand qu ale allo à Lourdes, al' ram'no des tchiotes fioles d' io bénite pour elle bin sur , mais aussi pour Madame Jeanne et Madame Suzanne ché voisines, mais aussi pour ché neveux qui habitotent al' cité 30, pi pas mal d' connaissances à elles

comme ale dijo, au retour d' Lourdes, ale arpasso pour ché zétrennes

ichi al' mason, in n a vo point, ale nous zin ram'no pas, savez chte tchiote boutelle in plastique makomoulée que chéto eune représentation d' la vierge et que d' dins y avo de l io puisée à la grotte

ch' fameux bénitier cha avo loin d avoir les proportions d' un bénitier normal, t éto loin d' pouvoir y baptiser in éfant, ti méto un dogt ché tout

chéto eune tchiote plaque qu in accrocho ach' mur , qu au fond yavo eune représentation souvint que chéto Bernadette et la Vierche Marie quand qui s' sont rincontrées

in d'sous en incrustation yavo comme un rameau, mi j auro dit un rameau d olivier, pi in d'sous ch' fameux "rinche doigts" , escusez me pour l'comparaison

quand que j' parlo des pelerinaches, Clara ale allo pas seul'mint à Lourdes, ale allo aussi à Lisieux

mi j' me souviens qu' as' mason ale avo toute la "panoplie" del bonne pélerine

ale avo tous ché cadeaux souv'nirs qu in pouvo avoir sur Lourdes et sur Lisieux, des achats personnels pi aussi des cadeaux que d' autes dames ale li rapporto , vu qu' ale avo bin trop d' maux as' déplacher les dernieres années


personnel'mint avec mes ziux d infants, m' préférée chéto Bernadette, su ché représentations in voyo que chéto eune jeune file toute simpe , eune jeune bergère qu ale éto toute émue d' vire la vierche ..........

tandis que Sainte Theresse d' Lisieux, mon diu, ale m' faijo presque peur, in tout cas ale éto sévére dins sin costume d' religieusse

d' toute fachon ale zétotent partout Theresse et Bernadette, dins des assiettes accrochées ach' mur, au fond d' ché plateaux pour l apéritif, su des fanions à franges , sul' bout des tchiotes cuillères

ouais ale avo cha Clara, un ensempe d' tchiotes cuillères à café, mais am' mote qu ale vérotent jamais l' moinde goutte d' jus , vu qu ale réstotent dans un écrin rouche arcouvert d un couverque en plastique transparent

au bout d' chaque cuilliere in voyo eune tchiote arproduction d' la grotte d' Lourdes

j avo oublié aussi ché boules à neiche, ale in avo eune que j auro voulu ayonner, mais comme chéto religieux mais qu ale avo bon fond , chéto Clara elle meme qu ale ayonno l' boule pour faire querre l' neiche


mais mi c' que j' préféro et de loin , chéto ché crayons souvenirs

ale avo un grand crayon d' bo mais savez un truc que ché plus près du format d eune baguette que d un truc pour écrire

j' exagère à peine, in tout cas yavo tout autour du crayon toute eune série d' photos du qu in voyo les différentes églisses, Bernadette, la Vierge Marie, un panorama des pyrénées, l' chateau féodal de Lourdes

et au bout du crayon vraimint pour qu in puisse pas l' perde, am' mote chéto impossipe, yavo eune fichelle avec un grand pompon jaune .......


mais min préféré et j' do avouer que ce type de stylo publicitaire cha m a toudis fasciné , yavo savez des stylos bile du que toute l' deuxieme partie chéto comme dans de l io, et quand té prenno le stylo pour écrire, cha faijo dévaler tout l' long du tupe soit un personnache soit un objet

là chéto un autobus qui faijo ch' yoyo dans l' tupe du stylo, tout cha sur un fond montagneux , écrit Lourdes en rouche, et quand que t écrivo le stylo i déchindo , en fait i donno l impression d' partir du pic du jer , et d aller jusqu à la grotte

après quand que té metto le stylo l' pointe en l air, cha faijo comme si ch' bus i arfaijo l' chemin mais en marche arrière

j' vous parle pas nan plus des chapelets accrochés par chi , par là ....des médales in doupe , in tripe exemplaires qui pouvo y avoir dins ses tiroirs

j' em faijo la reflexion , mais ch est bin personnel, que malgré toute s'dévotion , tous ché pélerinaches, ale a pas eu eune vie forchémint bin facile ..........

mais comme disotent certains, ale éto attindue là haut, j el voyo aussi , pasque ale avo un tableau du qu in voyo Dieu qui éto au ciel, les bras écartés, avec del leumière autour d' li et qui accueillo ché tchiots zéfants qui étotent partis trop tot

d' ailleurs cha cha m intrigo et cha fera l' objet d un aut' sujet ......

al maison d'em tante Paula chétot parel , y'avot tout ch'bazar la aussi
quand em grand maman al est morte , l'matin des funérailles , ej sus restée ass m'aison avec elle , l'aprés midi quand j'ai vu qu'al ss 'préparot pour aller au cimetière , j'i ai d'mindé si j'pouvos v'nir aussi , al m'a répondue d'vint tout'l'famille NON tu sais pas faire ta priére de toute façon!!, ché pas d'em faute si am maison au lieu d'Jésus , y'avot l' photo de Staline sous l'pile ed draps din ch'l'armoire...

je vous mets in photo un tiot bénitier que j'a treuvé dins mes cartons ch'matin , j'sus sure que ch'est el même que ch'ti dont minloute i parle

J'vous avouera que pour el mette in photo j'a passé un peu d'miror sur el médale du haut, mais in y vot bien la Vierge Marie, Sainte Bernadette et la Basilique de Lourdes