pylone electrique et religion , point commun

mais quo ch'est qui va cor nous babeller minloute ............ ch est eune cafougnette ou quo ? que rapport entre la religion et un poteau électrique ?

bin zallez vire que m' reflexion ale éto pas si babache qu' cha

à l' mason quand que j éto tchiot , j avo ker lire, et , en bandes dessinées, yavo pas que des bibi fricotin , des tintins ou des lucky luke

d ' abord cha couto ker, et mes parints i zavotent eune série d' liffes que j'vous avoue que cha m a bin fait poser des questions à ch' t age là et que j éto pas trop rassuré envers la religion

in avo eune série d' liffes très illustrés, qui racontotent la vie de saints ou de saintes

min préféré chéto chti su Sainte ODILe, et j' vous in mettra eune photo si j' l' artrouffe, nan Marie Claire ne doute pas, té conno min rang'mint.........................

chéto tel'mint min préféré que j' connaisso la vie d' Sainte ODILE par coeur, j' résume , chéto eune princesse alsacienne, elle aussi ale a vu la vierche , et aprés ses frères i zétotent méchants envers elle, mais ale réussi à convainque ses parints d entrer en religion
ale accueulle ché malates, meme ceux qui ont des maladies qui ferotent fuir tout l' monte

dinch' liffe ale donne toudis l imache d eune file pi d eune dame extrem'mint douce , qu ale a subit plein d' épreuffes mais qu ale a toudi eu l impression d' planer au d' sus des éven'mints pasque l'vierche marie ale éto avec elle ........

j a comminché à raviser les imaches pi al' lire , à peine que j' commincho à apprinte à lire à l école , cha fait un bail

mais bon l' histoire d' Sainte ODILE chéto j' diro eune exception ....


pasque j' lijo aussi la vie de Sainte Théresse de Lisieux , bon là prennez ché sacs à nasse, in va braire

ale perd s' mère à 4 ans, ale est elevée rapid'mint dans un carmel , ale meurt...... à 24 ans et j allo dire "baignée d' l amour du Seigneur" ale devient célépe à cause d' ses écrits , ale est béatifiée , cha d'vient eune sainte , et d' ailleurs dins les églisses si vous ravisez bin, in trouffe souvint l'estatue de Ste Theresse de Lisieux, pas loin d' celle d' Jeanne D'arc et d' celle de Bernadette Soubirous

j' va pas vous arfaire la vie de Jeanne d' Arc, brulée à Rouen par l' évéque Cauchon, ch' nom là in l a bin tous artenu, ale est morte à ....19 ans

in avo bin sur aussi la vie de Bernadette , tchiote bergère à Lourdes, qui vo la vierche et qui meurt à 35 ans in ayant passé l' plus clair d' son timps à prier .........



nous al' mason min père i avo sin préféré chéto St Dominique Savio

j' vous parle pas d' St Dominique ,ch' tueur patenté d'la religion chrétienne qui éto plutot pour mi plus mystique que bon chrétien ...

nan j' vous parle de Dominique Savio , là chéto pas eune bande dessinée, chéto un liffe au format d' poque, mais toutes les 2 paches yavo eune reproduction d un dessin

j' résume s' vie vite fait , y vivo dans un miyeu presque misérape ,et i avo tant ker Dieu qui a passé s' communion non pas à 11 ans mais à 7 ans, i éto habité par le seigneur comme i éto marqué dinch' liffe

i éto plutot malingre , i rincontre Dom Bosco , un ecclésiastique connu à ch' t époque là, qui le print sous s' protection, mais l éfant toudis habité de Dieu i meurt à 15 ans

vinguette que j' me dijo in arfermant ché liffes sur Dominique Savio , Bernadette ou Théresse , i sont morts jeunes

j' précisse que ché c'qui éto écrit dins ché liffes, i zétotent morts jeunes, meme Bernadette , meme si pour mi 35 ans chéto bin viu tout cha ......

mais chéto précisé et ché surtout Dominique Savio qui m interpello, in voyo des dessins d' li, qui avo des tchiots zéfants plus jones qu' li autour d' li, tous in admiration , et li, i les raviso pas, pasqu in voyo qu' sin esprit i éto accaparé par le divin, et in voyo qui yavo comme eune leumiere qui s' dégageo d' li

mi j' éto perplexe, in l' vo su sin lit juste avant qui meurt et y éto tout contint d' partir là haut

et ché là que mi j' avo dit tout naturel'mint à mes parints eune fo qu in éto à tape, que mi aussi j' voulo mourrir jeune comme Dominique Savio....(in plus j' savo qu' min père i avo choisi min prénom Dominique à cause d' li)

quo ché que j avo pas dit ! min père i m a d'mindé des zexplications, et dès que j a eu l' malheur d' parler d' Saint Dominique Savio et d'dire qui éto contint d' partir au ciel, m'mère qui pourtant éto plutot réservée, ale a sorti d' ses gonds, chéto rare mais voyez j'm in souviens cor
ale s éto importée, en dijant à min père d' ringer ché liffes, que chéto des sornettes, qui yavo rin là haut , que la religion fallo pas toudis la croire, loin de là ...

min père qui éto catholique pratiquant et croyant i éto bin imbété, d un coté aller à l'encontre de c'qui éto marqué dins ché liffes pi d un aute coté i savo bin aussi que chéto dangereux que j' cro à cha et ché ch' point là qui a mis en avant

donc in a ringé , hors d' portée d' mes tchiotes gampes ché liffes sur ché fameux saints .......

cha m a donc paru un peu comme des liffes "sulfureux" , des liffes interdits , des liffes à pas lire .......

mais dins m' tiete cha continuo à busier, et j'voyo toudis l' tiete de Théresse, de Bernadette, de Dominique toutes béates juste avant d' mourrir bin jeunes ....

j' vous avoue que quand que j a comminché à aller au catéchisme, j' éto djà pris un certain r'cul su Dieu, j' me dijo non pas qui existo pas , mais que justemint i existo , et à forche d' trop "l'coller" in pouvo printe des décharches éléctiques , savez comme ché poteaux quand qui a d' l orache

pour mi chéto cha Dieu, quéqu un que des gins pouvo aimer trop ker , et in l' cottoyant d' trop près , cha les brulo et i mourrotent comme cha très jones

ché pour cha que d'puis ch' temps là, j'fais bin attention de pas trop m approcher d' li, j'el ravisse quéqu'fo de loin, j y fait un tchiot coucou , mais j' garte mes distances, in asquident est si vite arrivé .......

Ché el lumiére divine qui frot mal alors??

A propos ed Don Bosco , yé dins l'égliss ed Turin du meme nom d'ailleurs , y'é imbaumé .

je vous mets en liens trois sujets avec les photos concernant l'histoire de Dominique Savio

Dominique Savio le livre

La naissance de Dominique

Dominique Savio et son père

Dominique , en latin Dominicus signifie "celui qui appartient au Seigneur" y'a bieau i faire des tits coucous ed loin, y'a pas d'échappatoire là ....