ché reliques .........
par minloute le, 15/12/2011comme tout l' monte in avo ché zhabits d' tous les jurs
et in avo aussi "les zhabits du diminche" , ceux qu in metto l' diminche cha vous zavez d'viné , ché pas la peine d' faire un dessin
pour min père chéto un costume, et chéto cor à la fin des années 60, les quémiches à boutons d' manchette, cha chéto "classe"
cha permetto d' différencier l' quemiche del semaine du qui yavo des boutons, et l' quémiche du diminche avec ché boutons d' manchettes, celle qu in metto pour aller à la messe, ou pour simplemint bin s' habiller pasque chéto diminche
chte différence cha a comminché à disparaite avec mai 68, aprés tout y a été plus "souple" quequ' fo trop diront certains , mais in peut pas aller à l' enconte du temps qu on dit .........
mais yavo aussi c' que j appelero "ché reliques" , là ché c' qu in sorto comme habillache dans les grantes occasions, comme un mariache , eune communion, un bapteme, en fait tous ché zév'n'mints heureux qui peuvent jalonner eune vie
yavo ché bijoux qu in arsoto....
souvint chéto eune bague qui veno d' eune tante ou d' eune grand mère voire d eune grand tante qu in avo pas connu , que seule l' grand mère ale pouvo cor faire le lien entre elle et nous .......
bijoux mais aussi camées, qu in sorto à l occasion et qu in v'no piquer dans l' revers d' un col d' rope ou d' chemisier....
broche in forme d' papillon installée en accroche coeur .....
médaillon armis autour du cou .............
cha permetto aussi au miyeu d un r' pas d'es'souv'nir de chti qui l avo porté , "cha vient d' qui cha ?" et int' répondo "ah j'sais pu bin attinds in va d'minder à mémé" ...
in d'mindo à mémé qui alors s' souv'no d'tout et ale te dijo tout d' suite de qui cha v'no et ale éto prète à raconter l' vie de chte personne disparue
j'em' faijo la reflexion, j éto tchiot mais j observo quand meme assez bin, ché que mémé as' souv'no plus facil'mint du prénom d' ché zancetes que mi un coup sur deux am' donno l' prénom d' min frère ...............
zallez dire ché pas graffe, mais à la fin chéto lassant .....
cha permetto donc à chacun d'es'souv'nir ou tout au moins d'pas oublier qu in éto l' fruit d' bin des générations et qui yavo eu avant nous , à peu d' générations , des fratries , des grantes familes qui semblotent soudées, heureusses et qu in decripto toudis avec l ' aide d' mémé in ravisant l' album d' photos ancienne qui éto pas loin
in faijo souvint cha quand qu in allo minger à la nouvelle année à mon dem' tante, in arsorto ché vieles photos cartes postales
faut dire aussi que m' grand mère ale avo un frère qui avo été blessé à la guerre 14 18 , i allo d ailleurs mourrir rapid'mint aprés , qui éto photographe d' profession
cha veut dire qu in avo pas mal d' photos d' époque , des photos d'familes dans les années 1900 1910, et des photos qui pour l époque pouvotent passer comme réalistes, car in plus d avoir des photos del famile j' diro classique, tous assis d'vant un décor à mon du photographe, in avo aussi des photos prisses dans la rue ......
et m' grand mère d' es' rappeler de chti chi ou de chtilale , quequ' fo j' vo l' visache dem' grand mère j allo dire s' métamorphoser..
savez comme si ché rides ale disparaissotent un quart de s'conte, chéto surtout du j' pinse à l éclair qui yavo dins sin neule, savez quand que des émotions ale vous zartouchent d un coup .....
cham'étonno d'vire m' grand mère alors agée d' plus 80 ans, qui avo eune tchiote larme pour un d' ses frères qui éto décédé en 1918 ou pour s' belle mère qu ale avo querre, et d un seul coup arfermer sin visache quand qu ale voyo l'visache de s'mère , faut dire aussi que s' mère et s' grand mère j va pas les escuser mais chéto pas des anges .....
pi m' grand mère à forche d' raviser ch' plafond dans les dernieres années d' sa vie in dijant " mon diu mais v'nez m'querre" , qu un jur, dieu i s a dit , bon j' va aller li dire d' monter , ale avo 96 ans .......
après sin décés, quand qui ya eu d' grantes occasions , ché bijoux, ché camées, ché médaillons i continuent d et' arsortis
sauf qu asteure in sait pu trop d' qui chéto , "chéto quéqu un del famile à mémé" qu in dijo, mais sans pu savoir asteure qui éto qui
ainsi va la vie, ainsi va ch' temps qui efface tout , les visaches, et ché bonheurs plus que ché malheurs .......
ej cros qu'astheur ché pus la peine ed rien laicher à personne, ed toute façon i vont tout d'suite aller l'vintt, ché gins astheur i s'in fouttent si eul bague al étot à mon onque un tel ou si ech'collier y'étot à ma tante einne telle, l'important ché ed faire des sous avec...!