au théatre ce soir anecdote
par minloute le, 22/12/2011nous vla chi d'vant la télé, j' cro bin que chéto l' vendredi soir mais j in su pas sur
retour au noir et blanc ...
la caméra fait un plan large d'la salle pi des balcons, on intind ch' brouhaha des gins , in in vo qui s installent cor malgré l' sonnerie qui vient d' retentir
min père dins sin fauteul à l enconte des gins qui s installent cor "dépéchez vous", "dépéchez vous" , "allez la madame au capio installez vous"
ché là que mi j interveno , j éto debout à coté del télé, à eune certaine distance pasque ch' poste d' télé chéto sacré fallo pas l' abimer, l' casser, l' toucher , l' froler, j avo eune étiquette d' brizaque (justifiée) qui m' précédo
alors j' attindo pret à bondir, pret à imiter ch' gars dans les coulisses qui buquo avec les 3 coups avec un gros baton qu in appelo "le brigadier"
tac tac tac tac tac tac tac tac tac tac tac tac tac tac tac tac tac tac TAC TAC TAC
cha y est ch' rideau i s'levo tout douch'mint , sous les applaudiss'mints des spectateurs ...
chéto l' début des portes qui claquent , des répliques qui faijotent rigoler ché spectateurs, Michel Roux i rintro sur scène et cha commincho .....
souvint i buvotent du wisquy, min père à chaque coup i dijo "ché de l io" .... d ailleurs j' do vous avouer que quand que j' vo dans un flime ou eune série des zacteurs boire un apéritif, j intind cor l' réplique systématique d' min père
parel, si yavo quéqu un dans la salle qui tousso , min père i dijo "taisez vous", si cha continuo i commincho à un spitche du ginre " faudro pas les faire rintrer ché gins qui toussent"
là m' mère ale baisso sin tricot et ses aiguiles su ché g'noux et ale dijo " Léonce tais te , in n intind pas"
pi si i continuo ale dijo" Léonce, si té parles in va cor moins entinte"
et l' pire chéto "Léonce té t intind pas avec tes bonbons , té fait UN BRUIT ...."
cha chéto pas bon signe , pasque min père i allo commincher à dire " que bruit ?", pi "mais nan j' fais pas d' bruit !"
pi m' mère ale va li dire "freume et' bouque quand té minche" , pi après min père i va sourire pi i va dire"ché vrai que j' fais du bruit ?"
mais mi si j a l' malheur d' dire d' faire moins d' bruit, cha j avo dro à "te trompe pas d adresse" .......
yavo l' entracte, min père i éto pret à "bondir" d' sin fauteul , dés qui voyo l' rideau qui allo déchinte, bondir ché un grand mot vu qui fallo qui s'déssaque d' sin fauteul avec s' gampe raite, s arléver pi aller "FAIRE PIPI SUR EUNE PIERRE BLEUE" comme i dijo à chaque fos
bin sur quand qui arveno chéto arcomminché et m' mère ale devo li raconter c' qui s éto passé, y éto pénipe pour cha
mi j attindo la fin, pasque quand que le rideau i allo s' baisser, j' em levo tout d' suite et j' allo mimer d'vant mes parints ché comédiens qui arvenotent saluer l' public
et j' essayo d ete syncro in dijant
" la piece que nous avons eu l honneur d interpreter pour vous ce soir est de ....." applaudiss'mints
"les décors sont de Roger Hart" applaudiss'mints
"les costumes de Donald Cardwell" applaudiss'mints
(in les zavo jamais vu, mais chéto toudis eux Roger Hart et Donald Cardwell qui étotent aux manettes des décors et des costumes "
AVEC ......
à chaque coup qui présento quéqu un qui avo jué , savez quand que tous ché comédiens i s'donnent la main, mi j'em' pincho en avant comme si ché zapplaudi's'mints i zétotent pour mi
min père i rajouto queque' fo, "t as vu chtichi ou chtilale y a pas été applaudi grinmint, i éto pas bon"
pi bin sur quand que l' comédienne ale annonço ch' comédien principal "ET MICHEL ROUX", j éto presque arcourbé , m' tiete au niveau d' mes chaussons
in est souple quand qu in est jone ....
cha y est ch' rideau i s ' baisse pour de bon, ché gins i s ' leffent pour quitter la salle
min père i faijo des commentaires sur les spectateurs du théatre "ah madame au capiau ale rit ale a du avoir ker ravisé cha aussi"
pour mi aussi l' rideau qui arqueyo définitiv'mint chéto pour mi l' heure d' la transformation
du grand acteur d' théatre applaudi par toute eune salle, d un seul coup j'm artrouvo in rope d' champe , pyjama et chaussons ...
j avo dro à " va faire pipi" pi " imbrasse tin père", pi " té monte t' coucher in arriffe"
si ché pas du vécu tout cha ...