j'tiens bon

j' a 10 ans, in est l' 23 au soir, j' tiens bon, là y a pu qu à attinte

aujourd hui sont arrivées mes soeurs qui viennent d' la normandie pour passer Noel tous ensempe

mi j' ravisse la grosseur des valisses, j essaye d' deviner à quoi qui peut r'sembler min cadeau mais vite on m' dit d aller vire dins l' cuisine si j y suis .....

j' va meme après leur poser des questions pour essayer d' leur tirer ché viers du nez, nan , impossipe al' dissent rin du tout

mi j' su interdit d' monter à l étache, j' vo m' mère qu ale l'donne un rouleau d' papier cadeau, am'mote que tout y éto par cor imballé

ch' t après midi j a ravisé Pinocchio al' télé , ch est un feuilleton pas un dessin animé, j a pas trop ker d ailleurs mais bon cha passe l' temps

pi taleure j a eu l' malheur d' dire " j' m innuie" alors là m' mère ale a trouvé l' phrase qui m a provoqué un haut l' coeur " té pourro commincher tes devoirs" ......

alors là ....j a failli m époumoner, j' cacho min souffe, mais rapid'mint, j a fait sintir am' mère que chéto un ennui bien passager , que l' semaine prochaine , j' mettra un coup supplémentaire ....

m' mère maline, ale a pas insisté, faut dire qu ale éto cor dans les révisions d'ses arcettes, est ce que j a tout, est ce qui manque pas quéquosse ?

Chéto sa hantisse cha, un peu comme Vatel l' maite d autel de Fouquet qui archevo louis quatorze à minger, fallo surtout pas avoir oublié quéquosse

donc du momint que j' bougeo pas trop du fauteul, j éto tranquile pour passer presque inapercu............

i' s'ra assez temps d' souffler , d' gommer, d apprinte, d' arcopier tous ché devoirs qui m attindotent sag'mint dins min cartape

mais li aussi i avo dro à passer un noel tranquile ...............

min père i éto déchindu al' caffe, i avo été choisir ché bouteles qui mettra sul' tape du 25 midi

i les zavo artiré des ranges bouteles tout rouillés qui occupotent tout un pan d' mur al' caffe

i les zavo plaché dans des portes bouteles in plastique, savez l' porte bouteles avec eune poignée , qui permetto d porter 6 bouteles d un coup .....

m' mère ale éto "devant" , ale raviso "vite fait" l état des grantes ménagères , raviso du qui yavo ché plats en inosque , ché saucières et s' cuillère espéciale pour qui a que ch' jus qui coule et qui arteno ché morciaux d oignons, sans parler de ch' plateau à fromache

vous m' direz yavo pas d' raison que cha a bougé d' puis l' année derniere , mais bon chéto surtout pour la rassurer

cha l impéchera pas d' main d aller cor raviser dins ch' placard , à la recherche d un second beurrier pour mette sul' tape quand qui a ché conviffes

savez ch' beurrier avec sin pitit coutiau à bout rond, à lame courte et large .....

m' mère ale allo arquerre in haut ch' rouleau en papier qui servira d' nappe , et qu in sorto pour ché grantes occasions su ché tappes........

in arcompto ché cayelles, in arcompto l' nompe qu in s'ra à minger autour del tappe ...

et m'mère ale avo l' pression ou plutot as' métto l' pression toute seule

minquo pu qu' min père qui li dijo "Odette t as pas oublié chi" "odette t as pas oublié cha" .....

mais chéto pas qu au niveau du repas qu in s' préparo, m'mère ale avo aussi ravisé ché rhabillures, mi pour l occasion j allo avoir eune belle cravatte, l' premiere que j allo porter, eune avec un motif asteure qu in diro "assez carqué" , enfin digne du parfais camouflage ....


cha y est tout est pret , enfin m' mère ale in est pas persuadée, mais ché normal chéto dinss' nature

mi j' a passé eune aprés midi cor assez calme, cor eune nuit, eune journée pi eune nuit et enfin au matin yaura distribution des cadeaux ach' sapin

courache mes gins courache

quo qu'té peut ête impatient ti alors , comme em'mère al dijot
" té t'innui , prind un martieau et tape d'su tes dogts "
cor in paire d'heure , et y s'ra la tin père noêl