pas m' journée préférée partie 3 souvenir d un sapin de noel
par minloute le, 26/12/2011ché ach' momint là que tout y bascule pour mi, si jusque ichi in avo pris soin d' mi, si jusque ichi ch' tiot y avo eune finte pour mi....
Autant là A L INSTANT que l' mère ale dit "bin va zi minloute comminche à raviser tes cadeaux", là ché fini ch' compto pu , j existo pu à leurs ziux ....
meme ch' dernier, la preuffe que ché zinfants i sont ingrats, i éto absorbé que par ché cadeaux et i m' ravisse meme pu
j' vous raconte quand meme rapid'mint la suite : ch' chtiot i s' précipito querre ché cadeaux, chéto des oh, des ah , pi eune fo qui avo ouvert 2 ou 3 cadeaux, ché zautes i comminchotent à ouvrir les leurs
là voyez in allo arquerre ché cadeaux sous mi mais presque sans ménag'mint, bon y avo quand meme l' mère qu ale dijo, vous l'savez d avinche "attintion à ché aiguiles" ......
ale rajouto alors au miyeu d' l euphorie d' l' ouverture des cadeaux "faudra que j' passe ch'ramon juste aprés"
là fallo qu' je fasse attintion à mi pasque vu qui yavo pas mal d' papiers cadeaux déballés par minloute qui trainotent à terre, fallo pas que quéqu un i gliche i qui s artiennent desespéremint à mi ...
j' vous passe l' euphorie d'l ouverture des cadeaux par ch' chtiot
rapid'mint sin frère , l' guiffe cor mal réveillée qui dit " in pourro avoir du café ?"
là autant pour mi min role étot pratiqu'mint terminé, autant par chte phrasse là " in pourro avoir du café" , in arvéno tout d' suite à la réalité
fait rarissime, tout l' monte prenno l' pitit déjeuner ensempe, chéto vraimint rare.....
rare pasque ché soeurs ale zhabitotent pu al' mason ......
rare aussi j' diro meme exceptionnel que ch' grand frère i so debout à ch' t heure là un jur qui travale pas
là eune fo autour del tape, et que tout l' monte i éto installé, la mère allo querre ch' café, servir ceux qui voulotent du lait caud "normal", ale verso ch' lait avec l' passoire pour que l' majorité ale a pas del' pio du lait qui a cauffé dinch'bol
pasque aprés ale fra cor arcauffer ch' lait pour ch' père qui li adoro qui a pas mal d' pio , un truc à vous faire dégobiller ch' t affaire ................
pour l' occasion, l' mère ale avo acaté ach' boulanger l' fameusse "coquile" qui mingeotte ach' t occasion , avec in plus del confiture
fallo au moins cha pour que ch' tchiot dernier i accepte d' printe un pitit déjeuner, trop occupé qui yéto à juer avec ses nouveaux jeux
ché grands i s'disotent intre eux c'qui zavotent eu comme cadeaux
d'ailleurs j' sais que ch' tchiot cha l étonno qu' sin père i so tout contint d archevoir eune cravatte comme cadeau, un coup à pas vouloir d'venir eune grante personne à la fin ......
l'mère ale veno tout juste d' s assire, ale avo assuré ch' service pour tout l' monte, coupé l' coquile , am'né ch' bure, ché coutiaux, l éponche pour essuyer au cas zou, l' boite d' chocolat, ché chuques,ché bols, ché tasses.............
cauffer ch' lait et ch' café et servi tout l'monte ..
ale veno d' s assire, et j' savo l' reflexion qui allo faire ch' père juste aprés
comme l' mère ale soufflo en s asseyant à tape après avoir fait tout cha ,ch' père qui avo rin fait d'tout cha i dijo as' femme mais j' vous jure chéto pas del moquerie ....
i dijo "pourquo té t enerffe comme cha, té vo cha a été", pi "fait comme mi , piam piam"
facile d' dire "piam piam" quand que tant que ch' père y a pas autour d' li sin bol, ses tartines beurrées, s'ptite cuillère, sin coutieau, s' serviette d' tape, l'pot d' confiture, cha li va pas.....
y a fallu qui d'minte tout cha as' femme ...
"Odette té raménera cha del cuisine " "Odette, y a pu d' beurre" ou alors plus suptil "Odette du qui est ch' beurre i n a pu"
alors l'mère qu ale voulo pas qu is désincrinque des' plache avec s' gampe raite, ale courro tout partout comme eune tenniswoumane au fond du cours à roland garosse ....
cha y est l' ptit déjeuner y est passé, l' mère ale s'arleffe vite fait,as' dminder si ale a vraimint eu l' temps d apprécier l' coquile ...
ale va tout d' suite faire l' vaisselle du pitit déjeuner , pour elle la Noel chéto eune journée d' marathon
aprés l euphorie du déballache des cadeaux, yavo comme eune baisse d' tension, un retour au calme, ché grands i mettent ché zemballaches vites dans l' poubelle lessiveusse qui est dins l' cour
y a eune des files qui passe ch' ramon en ingueulant ch' minloute qui bouge pas d un pouce en juant avec sin "Fort Apache" qui a eu comme cadeau
aprés tout cha cha va et' eune longue procession et des va et viens incessants
savez mi j' su situé au coin del cuisine, enfin quand qui zappelle cha l' cuisine, i devrotent dire la salle à manger
ché là qui minche , quo que souvint in dijo "salle à manger" dins l'pieche qui servo al' mason pour cha dans les grantes occasions
ale avo gardé ch' nom là avant qu in l appelle , avec l arrivée d' la télé et sin canapé qui allo avec "ch' salon"
mais arvénons à mon point stratégique, mi j' su au coin del cuisine, d' là j' a eune vue sur " l arriere cuisine" qui éto l' pieche du que justemint l' mère ale faijo l' minger, ché là qui yavo ch' fourneau
mais chéto là aussi qui yavo le lévier , ouais pasqu i zont eu l' salle de bains qu en 1978........
imaginez l' casse tete pour l' mère d' devoir à la fo utiliser l arriere cuisine pour préparer à minger et permette aussi à ché gins des' laver et que tout, gins comme plats , soient prets pour l' minger d' 12h30.....