commint boire du chocolat fro avec eune paille ?
par minloute le, 27/12/2011j'deminte à ché plus jones d' pas lire c' qui va suiffe , et aux plus anciens d'et' indulgents ...
savez y a 40 ans, zallez dire que cha comminche à compter, mi j' vous diro que ché pas si loin qu' cha vu que chéto m' n infance, in avo comme diro un économiste "eune offre moins diversifiée"
que bio terme....j' me souviens aussi d un cours d économie qu in avo eu au lycée Carnot qui nous dijo et là chéto plus tard , dans les années 78 79, l' prof ale nous avo dit qui yavo un pourcentache important j' cro plus d' 85 % , de produits qui n existotent pas cor en 1978 , et qui serotent dins not' quotidien en 2000...
al' reflexion cha m étonne pas, ravisez djà ché gouters, quo qu in gouto nouzautes?
Bin des pates d' fruits (beurk) ou des vrais fruits, pi des tartines
dins ché tartines t artrouvo l' plus souvint eune barre d' chocolat que l' mère ale avo coupé comme ale a pu d' toutes ché forces en l' séparant del tablette ......
en boisson chéto souvint de l io avec du sirop, del limonate, du jus d' fruit en lite , du lait frod avec du chocolat
en fait c'qui a l' plus cangé , ché qu in a surtout individualisé les portions
ouais cha a suivi l' esprit du temps, tout y s a d' plus en plus individualisé ...
asteure in acate des gateaux aux chocolats, des p'tits pains fourrés, des barres chocolatés pour ché tchiots , la plupart du temps quand que t ouve l' boite ché des sachets individuels
au niveau des boissons, in a developpé les bouteles d' tchiotes tailles
asteure cha vous parait pu extraordinaire, mais busiez un tchiot peu, cha fait pas si longtimps qu' cha qu in vo des bouteles d' io en emballache plastique de 50 cl.......
et que dire des boissons , in trouffe d' tout asteure en berlingots, en minipack, en 50 ou 25 cl...
mi j a connu un temps , mais rigolez pas ché plus jones, j a connu un temps du que boire un chocolat frod avec du lait et eune paille , chéto l' somome du lusque ...
quand que j in voulo j' demindo à m'mère, un coup sur deux ale dijo que chéto elle qui allo l'faire ...........
jel comprinds aussi, vu que savez tous asteure commint j éto "doué" ...
vlà ci dessous eune liste non exhaustive comme i dissent, ou si vous préférez eune liste qui pourro cor éte complétée, des betisses , des maladresses que j' pouvo faire en m occupant d' préparer min chocolat frod
tout c'qui suit ,j l a fait ...
poser l' boite d' nesquik sul' tape, avoir du mau à ouvrer l' couverque, insister "un peu" et que l' boite d un coup ale s' ouffe quand que j' m y attindo pas et qui avo plein d' cacao sur min pull et sul' tape ...et pratiqu'mint rin dinch' verre...
m'man, j' l a pas fait exprès........
printe l' grosse cuillère pour verser ch' chocolat alors que m'mère ale avo dit d'printe eune tchiote, et au lieu d' mette deux tchiotes cuillères de cacao, in verser 2 pelletées que cha rimplicho l' verre djà à moitié ........
m'man j' la pas fait exprès......
printe l' boutele de lait, chéto djà eune boutele en plastique avec eune capsule d' sus, et trop baler d un coup , in auro dit eune "fontaine miraculeusse" , que cha débordo sul' tape
et cor zallez dire chéto del toile cirée .....
ouais ptete mes gins , mais zavez djà vu un liquite qui d'minte qu à s in aller , bin ché pas l' toile cirée qu ale va l' freiner , au pire cha va meme l ' accélerer ...
m'man j' la pas fait exprès .........
comprenez asteure que m'mère ale préféro s in occuper elle meme
par conte voyez , quand qu ale faijo l' préparation, c'est à dire printe un verre, aller querre l' boite d' chocolat, pi l' boutele de lait et l' paille , ale faijo cha par précaution ou j'diro plutot après queques catastrophes d' ma part, à eune certaine distance d' mi ...
faut dire que j'voulo souffler avec l' paille dinch' verre juste aprés que m'mère ale avo versé ch' cacao
quand que j' faijo cha "bien", cha invoyo un nuache d' chocolat in dehors du verre, minquo pu que cha arrive dins mes ziux ou dins min nez, que j' comminche alors à éternuer ou à vouloir frotter mes neules et j' invoyo baler ch' verre sul' tape
et là m'mère am' disputo au lieu d' m aider ou d'em soutenir à pu m énoquer ....
in voyo qu ale avo jamais pris du chocolat comme mi dins l' nez , sinan ale auro eu del compassion ...........
allons imaginons que m'mère ale a bin versé ch' chocolat dinch' verre , mi par dessus ch' lait caud , là i fallo crier STOP
ouais fallo crier stop et dire am' mère que ché mi meme qui allo touiller ch' mélanche avec l' cuillère
là yavo fallu montrer patte blanque, pasque bin sur cha m éto arrivé plus d un coup d' vouloir l' faire mi meme, mais voyez j' va vous rappeler des souv'nirs d' vot' infance ...
ch' chocolat à ch' t époque là, meme si y éto solupe dans l' lait frod, fallo quand meme l aider (à savoir aussi que nous in acato pas l' chocolat Poulain pasqu i s' diluo pas bin dans l' chocolat frod)
j' arviens à min touillache d' chocolat, zavez djà vu que plus qu in ayonne vite l' cuillère dinch' verre, in tournant l' plus vite possipe, cha faijo comme un mini tourbillon in haut du verre ...
j' avo ker d' temps in temps faire ch' tourbillon , j' voyo ché tchiots derniers grains d' chocolat en poude qui tournotent à toute blinte al' surface...
tel un batiau emporté par un puissant maelstrom (faut dire aussi que j éto dans ma période du que j' liso beaucoup des Jules Vernes ......)
bin sur cha a débordé plus d un coup ...mais l' pire ché quand que t ayonno trop vite l' cuillère, chéto pu eune cuillère mais l' bourdon d eune cloche, cha faijo gling gling gling et souvint j' do dire chéto comme le glas del catastrophe qui s annonço ...
in va parler d' probleme d' force centrifuche ou alors l' cuillère ale tapo trop fort dins ch' verre, in tout cas chéto un probleme d' physique pire que ché robinets qui fuitent à résoude...
bref , ch' verre i s'soulevo d un coin des'base et i ballo sul' tape
là quand que chéto tout l' contenu qui s'verso sul' tape, t avo intéret à faire deux chosses
d abord app'ler t'mère à la rescousse , pour qu ale nettoye avant que ch' père i rinte ...
pi t'sauver pasque té savo que cha allo cauffer su tin derriere ...
mais imaginons qu in so arrivé à un state du que m'mère ale a à nouviau confiance .....
alors j' va vous dire l' somome du plaiji des' servir un verre d' chocolat frod , tout cha sans que m'mère ale ravisse
tout d abord mette deux bonnes cuillères d'poude d' chocolat dins ch' verre
pi verser ch' lait frod par dessus
là , STOP , comme j a dis plus haut, fallo pas que cha so m'mère qui mélanche , j' préféro que cha so mi......
pasque au début j' mélingeo pas ...
j intinquo l' paille dinch' verre , savez jusque dins l' niveau du qui avo cor del poute d' chocolat qui s éto pas mélangée avec l'lait ...
et là té soufflo d'toutes tes forches, et juste aprés té raviso ch' verre, cha provoquo des zarmontées d' chocolat en poute , qui s' mélingeotent avec ch' lait frod , cha faijo de bios dessins
mais comme souvint j avo mis tel'mint d' chocolat, que ch' lait i pouvo pas tout absorber, alors j' buvo min premier verre d' lait avec ch' chocolat qui s éto bin mélangé
pi j arverso du lait frod dinch' verre pour in faire un nouviau mélanche
là tout i s' éto bin mélangé, et là j avo ker chéto au lieu d aspirer par l' paille, chéto d' souffler dins ch' liquite, cha faijo des blup blup blup
bon fallo pas faire cha d' trop sinan m' mère ale l intindo et ale avo s' réponse couperet " ché l'dernier coup que té bo cha avec eune paille"
mi j avo ker aussi aspirer , l'laisser dins m' bouque , pi l' arlaicher déchinte dins ch' verre, j' observo ch' niveau du verre armonter ...
que dégueulasse ch' minloute, eh oh, arretez l avez tous fait
pi voyez comble d' l ironie , queques zannées après in a étudié cha en cours d' physique au collége Rostand, chéto durant les 10%
les 10 % cha a été eune initiative du ministère de l éducation nationale , ché profs i devotent consacrer 10 % de notre temps à nous faire découvrir des chosses mais par un coté ludique
donc ch' prof d' physique i nous avo fait un cours, véridique , avec eune boutele de lait et du chocolat en poude, i nous avo expliqué la force centrifuge, pourquo que ch' chocolat is mélingeo que jusqu à eune certaine limite dans un volume d' liquite, i nous a expliqué aussi l' principe d' la paille et d' la langue qu ale faijo clapet que ch' liquite i déchindo ou armonto ..etc etc etc ..
ch' jur là j devo avoir dans les 13 14 ans, j' m éto empressé au retour du collége d' expliquer cha à mes parints en arfaijant l expérience devant eux et en ardisant les zexplications que ch' prof avo donné
asteure pour conclure, mais vous l'dites à personne, savez y a des coups, j' do avouer, j a ker arfaire mi meme un mélanche d' lait frod et d' chocolat, et savez ch' meilleux momint ?
ché quand quand qu on souffle dins l' paille et que cha fait glouglou al' surface ...
Déjà qu'lautt fos , j'ai essayé ed faire tourner ech'crochet d'ech porte manteau in faisant "Vroum vroum" vous vous rapplez l'histoire ed ché aviateurs à Minloute? , bin si asteur ej bos min chocolat in soufflant d'dins avec einne paille , ej cros que m'n'homme i va bloquer ch'site ... in tout cas ej rigole bien mi!