''Aspire La Liberté''

J'a un peu hésité à mette cha comme sujet mais cha fait partie ed nou histoire aussi

Quand in fait del généalogie in découvre plein d'choses très intéressantes sur la vie ed nos familles, et notammint leurs migrations au fil du temps et aussi des activités , comme à l'ouverture des mines in vot les familles es déplacher, quitter la campane partir dù qui a des fosses

J'a aussi vu dins m'famille les premier mineurs étotent dins l' boulonnais, pis après avec les fermetures i sont arrivés au plus près pour eux ch'étot à Enquin-les-mines

In vot aussi arriver des ancètres belges à Somain, Vermelles ou Mazingarbe et core ailleurs
Pour ceux qui sont mineurs in les vot aussi canger d'fosses et d'ville au fil du temps

Autant in peut dire qu'à eune époque i restotent dins l'même ville sur plusieurs générations, et s'mariotent presque toudis intre eux, ch'étot c'qu'in appelle l'endogamie, au pire avec el ville et l'villache voisin, mais i s'mariotent aussi souvint in famille un peu éloignée bien sur ou famille par alliance, mais quand in épluche les actes d'état-civil jusque fin du 18ème in vot gramin de "dispense de consanguinité" accordée par l'Evêque pour qui puissent es marier

Autant in vot bien aussi qu'à partir du milieu du 19ème les familles étotent gramin plus mobiles
J'vas printe l'exempe d'un d'mes arrières grand-père qui étot né in 1864 à Arras dins eune famille ed marchands d'vaques et d'dentellières

I s'a marié in 1889 à Bully-les-Mines avec eune fille de Sin-le Noble (59), leu première fille est née à Mazingarbe in 1892, el deuxième (em grand-mère) à Calonne-Ricouart in 1897 et l' trosième à Estrée-Blanche in 1904
I étot mineur et i a fini porion aux mines de Ligny-lez-Aire, ch'est pour cha qui étot installé Estrée-Blanche

Donc in vot bien qu'à partir ed la fin du 19ème, à part ceux qui vivotent du travail ed leus terres, sinon les ouvriers étotent assez mobiles

In y passe du temps à faire del généalogie, in peut dire que ch'est eune passion, mais in in découvre et in n'apprind gramin sur es famille et les coutumes des générations qui nous ont précédées


Bon asteur ej vas vous espliquer pourquoi j'a mis ech' tite là "ASPIRE LA LIBERTE"
Passequ' y aute cosse aussi d'intéressant à suiffe au fil des sièques, et qui souvint nous interpelle gramin quand in dépouille des actes ch'est les prénoms ! , alors là in crot faire dins l'original ed nos jours, mais ch'est là qu'in vot que les prénoms cha a toudis évolué et qu'y a toudis eu des prénoms "originaux"

Passqu'y avot des prénoms qu'in peut considérer aujourd'hui un peu originaux passqu'in fait i z'ont disparus mais y avot aussi les prénoms que j'qualifieros plutôt de rares même ed leur temps

j'vas vous donner tros exempes :

Y a eu une mode assez répandue courant 18ème et 19ème d'associer les prénoms "Fidel Amand Constant" ..., cha devot pas ete du hasard, ou "Amand Fidel Constant" ou "Constant Fidel Amand", l'association des tros prénoms m'avot interpellée mais el miux que j'a vu ch'est quelqu'un qui est né in 1755 à Habarcq(62) : Fidel Amand Constant D'Amour , D'Amour ch'est sin nom d'famille , ch'est pas biau cha ...

Et j'vous passe les Fidel Amand mariés avec des Fideline, ou Pacifique Constance

Toudis dins l' 62 j'a vu comme prénom "Raison et Vertu" (né vers 1790), Raison étot un prénom masculin un peu répandu fin 18ème


Mais mi ch'ti que j'préfère ch'est quelqu'un d'em famille qui étot né in 1794 à Ecurie (62) (donc juste après la révolution) et qui avot pour premier prénom Aspire et deuxième prénom La Liberté !!!
ASPIRE LA LIBERTE, ed tous les prénoms rares que j'a vu ch'est de loin ch'ti que j'préfère
J'a vu d'autes Aspire, mais pas d'autes Aspire La Liberté, ch'étot un prénom unique


Un jour j'vous mettra pétete eune tiote liste ed prénoms originaux du 16ème au 19ème, tous issus de l'état civil du 62 et du 59

jcomprinds ach'teur pourquoi , j'fais pas d'généalogie , j'sros perdu din tout chés noms , ché grammint plus facile à lire quand ché du tout cuit , continue marie claire , ch'ti qu'ech'préfère comme prénom , ché amant constant , si ché pris d'in l'sens qu'ech'pinse

pour aller dans l' sens d' Marie Claire, j' viens d' trouver dans les archives départementales du pas de calais, recensement de Cauchy à la Tour, page 6 du recensement de 1856, une fille prénommée "Agricole" .

pour répondre à minloute
quand in donne comme prénom à s'fille AGRICOLE ... faut quand même avoir eune grande culture .

que culture ch'te théo , fallot l'trouver chelle la , mi j'ai connu in tiote , ach'teur , al a intre 15 et 20 ans al s'appellot chloé ( banal commun ) mais souvint in l'appellot ach'mur