les matins d'hiver
par Marie-Claire le, 08/02/2012les matins et les soirs d'hiver ..
Inch'momint i fait très frod partout in France et cha m'rappelle les hivers d'em enfance
J'em rappelle qu'dins l'Nord y avot souvint des hivers très inneigés, plus qu'achteure j'sais pas trop mais mi cha m'fait ch't'impression là.
J'em m'souviens qu' quand j'habitos Enquin-les-Mines, in prenot l'car scolaire pour aller au collège à Thérouanne à 7 kms et contrairemint aux idées reçues, ché pas un pays si plat qu'cha l'Pas d'Calais ... In tout cas à Enquin et dins les invirons ch'est très valloné
El matin au rével avant d'sortir ed min lit j'savos si y avot del neige ou pas passeque les queques carettes qui passotent devant l'mason ales féjotent pas el même bruit
Si y avot neigé et qui n'avot eune tiote couche tout les bruits étotent plus feutrés
Alors quand y avot del neiche l'matin, j'deschindos quand même à l'arrêt d'car au carrefour in bas dem rue, j'artreuvos mes copines et copains qui attindotent à ch't'arrêt là, in étot tros quate ou cinq selon les années, pas plus et in attindot sur el tiot trottoir devant l'café qui étot à ch'carrefour, non y avot pas d'abribus cha n'existot pas core, in tout cas pas dins min tiot villache
In attindot donc un peu in ravisant el route par dù que l'car i devot arriver in espérant qui arriverot pas bien sur ... Et pis ch'étot pas des cars ed compétition comme asteur, ch'étot des viux cars d'eune tiote compagnie d'Aire-sur-la-Lys, les cars Inglarts, des cars et des bus comme os n'avez certainemint connus
Et bien sur chés routes ales étotent pas dégagées
J'em souviens que dins l'villache chétot un tracteur qui passot et qui avot quelqu'un à l'arrière dins l'remorque et qui jétot du sape sur el route
Donc quand l'neiche ale vénot juste ed querre dins l'nuit y a des jours in s'doutot bien dès l'départ que ch'car i passerot pas passqu'i pouvot pas monter chés côtes du coin.
In attindot quand même un bon momint, passequ'i pouvot aussi ete in r'tard, et inviron au bout d'eune tiote heure, si si in étot sérieux ... et pis faut dire qu'un jour cha nous étot arrivés d'arpartir et que ch'car i étot quand même passé après, in n'avot pas eu les félicitations du jury au collèche ..
Donc au bout d'un bon momint ben in arpartot à nou mason et là in in prenot pour deux jours d'vacances in général, deux jours d'vacances pas prévues, dins l'neiche, chétot génial.
Par conte y a eu des jours dù que ch'étot moins marrant, passeque el'pire chétot quand cha arrivot dins l'journée et que l'matin y avot rien. Ch'est arrivé un coup, i avot rien du tout el matin, i a comminché à neiger dins l'matinée sans arrêter jusqu'au soir, et j'sais pas qui connot Thérouanne mais y a eune sacrée côte sur presque deux kilomètes à l'sortie du villache dins l'direction d'Enquin, intre Thérouanne et Enguinegatte, in plus faut vous espliquer que ch'est la campane, que des tiots villaches et que l'route in question ale étot intre deux villaches vraimint in rase campane comme in dit, aucune mason à l'horizon
Ch'qui devot arriver arriva au soir in sortant ed Thérouanne, ch'car i a pas pu finir d'monter l'côte, ben i restot qu'eune cosse à faire, in est tous deschindus du car et in a fait ch'trajet à pied dins l'nuit et dins eune bonne couche d'neiche et des congères tout l'long et qui neigeot core d'ailleurs, jusqu'au villache suivant à Enguinegatte à 4 kms
Arrivés là, in a téléphoné à ceux qui avotent el téléphone ... i n'a qui sont restés chez l'habitant et d'autes qui sont rintrés autremint à leu mason, mi j'sus rintrée dins eune dépanneuse du garache d'Enquin avec d'autes infants d'Enquin, cha devot ete in 1970
Achteure cha n'arriverot pus, avant même qui neiche ches cars scolaires i n'ont pus l'drot d'rouler , et in nous aurot pétete pas non plus laicher faire el route à pied ed nuit dins l'neiche , in tout cas pour mi ch'est pas du tout un mauvais souvenir bien au contraire
si chéto achteur Marie Claire ech cro que tous ché gins i crirotent au loup in disant que ché del faute ach gouvernement (quelque soit le bord politique) in disant que ché honteux de laisser rintrer ché pétits din l'neige.
Mi j'resto din l'rue de la Comté à Bruay, juste in haut del côte et les meilleurs souvenirs que j'ai quand i faiso un gel comme inche momint (de décembre à fin mars) cha nous incito à faire du sport : quand t'arrivo din l' chambre pour ette coucher, té voyo 2mm de glace sur ché carreaux à l'intérieur, hé bin té faiso des pompes pour te récoffer avant de t'mette tin lit.
Ouais, je l'sais nos mères i z'avotent mis une bouillote juste avant...comme cha, au lieu d'faire 3° y faiso 4°.... He pis in n'est pas mort, et j'armarque que inche momint ché pas notte génération qui s'plaint plus du fro.
ho! oui Marie-claire, je partais depuis Saint-Omer dans ces années-là pour Aire sur la lys en faisant le tour de quelques villages et villes .
Dans les bus de l'époque on était quand même bien au chaud vu ce que l'on voyait dehors! par contre c'était très joli!
je me souviens très bien! tout était enrobé de givre ou de glace dans le petit matin, dans les marais et le soleil parfois pointait son nez .
Et bien là, ça le faisait!! un spectacle de toute beauté ! et dans le bus à cette heure là, beaucoup faisaient comme moi à se régaler on entendait une mouche voler...
Oui Dédée, et on peut dire que l'Audomarois est une belle région et bien que l'ayant quittée il y a environ 35 ans , j'y suis restée très attachée ...