à sintir l' finquée

ch' matin j a été marché pas loin del mason, dins ché vignes yavo des viticulteurs qui étotent en train d' faire bruler des branques mortes et cha finquo sec ...............

à sintir l' finquée, cha m a rappelé que cha s' passo aussi dins ché gardins au bout del rue Leverrier

vous dire si chéto en automne ou en hiver, j' pourro pas vous l' dire, mais j' me souviens que ché gardiniers faijotent cha à peu près au meme momint

i faijotent un tas d' tout c'qui pouvo trainer dins ch' gardin et qui éto fané , tout cha avec eune fourche qui avo des pointes fines

quand que j' dis qui zin faijotent un tas, i mettotent pas tout d' sur , pasque comme ché déchets étotent pas forchémint complet'mint sec, cha finquo pas mal

j avo ker et' là avec min père quand qui faijo cha, oh fallo que j' reste à bonne distance, vu m' réputation d' avoir 2 mains gauches

mais j avo ker courir tout autour, à eune certaine distance, en fait j avo ker passer dins l' sens del finquée, en bouchant min nez ach' momint là

bon fallo pas que j' fasse cha trop longtimps pasque cha allo enerver min père, pi si j' passo trop souvint, en rintrant al' mason m' mère ale allo vite arpérer que j' sinto comme un hareng saur, et j' me f'rai ingueuler aussi

nan min plaiji chéto d' rester à coté d' min père, pi d' temps in temps im' permetto d' jetter quequ' branques fanées, ah cha j in éto fier

j avo ker intinte ché branques crépiter , sintir l' finquée .....pi et' aux cotés d' min père ...........

mi aussi , j'avos ker cha meme si je m'fesos ingeuler aprés "ej vas devoir d'arlaver tes caveux qu'al disot em mére , té pues à 100 metes!"

Min pére i brulot ché feulles quand chétot infesté ed doriphores (ché feulles ed pétotes) y'avot des années que chétot plein et pis des années que ché pétotes al z'avottent einne maladie (l'mildiou) qu'cha s'applot. Ej sais pas si chétot à causs d'ché tiotes bestioles la.

té vos minloute ché cor in cosse qu'j'avos oublié, in brulot chés fanes ed' pétotes, chés mauvaisses z'herpes, qui comme té dis z'étotent pas toudis bin sec, et cha funquot dur, alors avec ch'te fourche bin pointue fallot ayonner pour aérer et cha arpartot d'plus belle

par conte ti aussi t'as oublié in cosse TRES importante et qui faijot note régal
chétot chés pétotes qu'in v'not d'arracher et qu'in devot laicher sur plache un ou deux jours pour qui "jettent le fu" comme in dijot
mais pour pas qui jaunistent fallot les protéger du solel in les z'arcouvrant d'fanes et d'mauvaisses herpes, et surtout quand in est arrivé al cité des fleurs in 1948, fallot faire gaffe si yavot pas d'balles ed' fusil ou des tiotes munitions, chés pas s'qui manquot, a ch't'époque, j'm'aperços qu'j'avos oublié pal mal ed'cosse qu'yarvientent au fur et a mesure
bruler chés fanes et chés mauvaisses herpes , chétot aussi un régal pour mes tiots infants, ya cor 6 ou 7 ans d'cha

que tiote tête qu'ech'fais , j'ai oublié ed'dire qui fallot faire cuire chés pétotes , j'espère qu'vous avotent compris et qu'vous z'avez pas mingées tous crutes

minloute i nous dit que tous ché gardiniers (nos pères) i faizotent bruler ché herbes à l'même heure, mais el raison al éto toute simple. Au momint qui z'allumotent t'é pouvo raviser, y avo pu du tout ed linge in train d'séquir din ché gardins... passe que cha auro été la guerre. Arlaver des ch'veux chéto imbétant mais être obligé d'arlaver el lessive ch'auro été aut cosse. Ach tépoque là le respect on savo c'que chéto.