l'lette d'min père
par LA CLO le, 25/04/2012J'étos passé à côté d'l'artique à Maurice Devos. L'texte de Maurice m'a touchée. In vot malgré tous ches obstaques de l'vie, quanqu'in a l'amour d'ses parints cha vous suit toudis.
Mi hier j'étos in pleurs in ravisant l'lette qu'm'in père i m'avot invoyé après l'naissance d'min deuxième garchon. (in avot pas l'téléphone, internet et tout cha, in prenot l'temps d'attinde l'courrier)
Ch'est eune lette écrite sur eune page d'cahier d'écolier, oh fot pas raviser ches accords, ches fautes, ch'est mi graffe ch'est écrit avec l'coeur.
In rintrant del fosse y a mingé tout seul pis i s'est mis à m'écrire in m'disant tout l'bonheur qui ressintot d'avoir un deuxième tiot li qui a eu qu'des files, i décomptons les jours pour vénir nous vire (m'mère ale étot venue chez nous avec m'tiote soeur).
El'lette ale est rimplie d'tendresse d'amour pour s'famile. J'in ai fait eune copie pour mes garchons. J'cros qui in a pas écrit d'aute comme cha ou alors quanqu'il écrivot à m'mère in étant tout jone.
J'ai core des frissons in vous l'disant, in a du mal à imaginer des hommes durs au boulot, peu démonstratifs écrire des pages ainsi. Magnifique !
tout cha cha m'rappelle in lette qu'em mère al ma écrit quand j'étos à l'armée et ché l'seul lette qu'al a fait din s'vie, et cha j'in su sur, et pas seulemint passe qu'al mé la dit ,nan, tout simplemint passeque j'el sais
j'l'ai gardé très longtemps ch'te lette, et pi un jour qu'j'ai voulu l'moutrer à mes tiots infants, bin pu moyen d'mette em'patte ed'su , j'em m'rappelle pu d'chés mots qu'yavot d'su , mais j'sais qu'chétot des mots super formidapes pour in femme qu'yavot jamais été à l'école
mais qui m'dijot avec ses mots bin à elle, et comme dit la clo, avec ses fautes, mais cha et ché bin vrai, j'n'y faijot pas attintion
j'm'aperços qu'ché bin vrai qu'chés souvenirs y s'arvientent, in lijant chés commentaires