dins ché rangs

quand qu in déchindo à la piscine ou en ville avec l' école Loubet, j' vous la djà dit , fallo et' bin en rang, pas parler ou tout au moins pas parler fort, bin acouter, sinan yavo des claques qui arrivotent de j' sais d où ...........

ou plutot in savo, cha veno du directeur d' l école qui prenno toudis un malin plaiji à surprinte untel ou untel qui commincho so à parler un tchiot peu trop fort ou à commincher ou plutot donner l' esquisse d un début d' comminch' mint d' chahutache

l' tout chéto d' abord inter nous quand qu in devo s' mette in rangs avant d' sortir d' la cour d' s' regrouper inter bons camarates

pi après tout éto fonction du qui éto plaché ch' directeur dans la file ...

tout l' temps qui resto derniere nous, in évito d' parler , in éto "saches" , mais l' tout j' va vous l' dire ché qu in éto plachés selon les classes, c'est à dire ché plus grands à l arriere, l' classe du directeur, pasque chéto là qui s' placho dans la file , pi aprés chéto fonction d' l humeur du momint

in voyo not' "délivrance" quand qu in l' voyo passer plus vite d' nous, et aller foute eune targnole par chi par là, et j' vous jure j' vous dramatise pas l' personnache

alors quand qui éto passé et suffisammint loin, i n navo toudis un qui avo eune cafougnette, eune histoire à raconter

chéto souvint des histoires intindues , pas toudis comprisses, mais qui avotent bin fait rire l' famile, ou alors et là chéto les pire chéto celles qui étotent inventées tout au long d' not' périple

chéto souvint eune histoire avec l' fameux Toto ...... là chéto l' frère à toto qui dormo tout nu, mais qui ronflo fort, alors s' femme ale li coupo sin zizi, ale le metto dans zin bocal, et bin sur al' l oublio ch' bocal et y avo toudis eune voisine qu ale veno quand qui avo pas personne al' mason et qu ale avo faim et qu ale ouvro un certain bocal et qu ale mingeo l' "saucisse" et qu ale dijo " ah vraimint ché del bonne saucisse" ....

zavez vu ch' niveau , chéto un mélanche d' histoires intindues j' vous dijo, pi aussi d' questions qu in pouvo s' poser, surtout à eune époque où djà tout l' monte avo pas forchémint l' télé, et qu in voyo jamais "un sein" al' télé à moins qui a l' carré blanc au coin à droite d' l écran ...

intre nous cha a bin cangé, asteure faudro compter su les dogts d' la main les jurs du que justemint in vo pas eune paire d' gougouttes al' télé

pour in arvenir dins ché rangs des écoliers qui déchindotent en ville, nous qui étions jones, in s' moquo discret'mint des gins qu on croiso so à pied so à mobylette ......

ah ché jones.................

y a qu in coup qu in rigolo moins dins ché rangs et j' diro meme pas du tout quand qu in allo au défilé du 11 novempe

chéto djà un jur particulier vu que chéto à la fois un jur férié , mais qu au matin in devo s' rinte à l école , et sans rintrer dans ché classes, eune fo tout l' monte arrivé, in s'metto en rangs pour déchinte en ville ...

quand qu in arrivo à coté du monumint, là fallo pas faire d' bruit , pour s ' recueillir, mais vous nous connaissez, in avo quequ' fo du mau à pas rigoler, faut mette cha sul' compte d' not' jeunesse , quand qu in voyo ché viux anciens combattants

djà un ancien combattant, si y est ancien ché qui est viu, en plus que nous qu in n avo pas 10 ans i nous paraissotent cor plus viu dins leu costume du qui zavotent alignés des séries d' médales, et qui portotent des gants blancs pour artenir ch' drapeau ..............

mi, s'que j'avos ker à la fin de ch'défilé , chétot ch'laché d'pigeons aprés ch'discours au monument aux morts, y'avot tous ché paniers à terre et quand i les z'ouvrottent chétot bieau à vir , y'avot meme un tiot ed nott rue qui disot "cheux la ché cheux d'min pére" commint qui fesot à les arconnaitt seulmint à les vir tournoyer autour ed nott tiete?