diminche matin
par minloute le, 27/05/2012cha li prenno quequ' fo l' diminche matin ...... et là fallo s' garer, chéto quand que min père i avo décidé d' faire un pitit déjeuner espécial
so in avo drot et là chéto l' pire à c'qui sorte l'grille pour faire cuire ché saurets , ou plutot arcuire ché kippers, savez ché harengs qui sont djà bin fumés au d' sus dech' fourneau
com' diso m' mère, "cha y est j va pouvoir ouvrer ché farnietes et aérer tout cha"
ché vrai que cha "finquo sec" , à croire que cha plaiso à min père ....
mais d'temps en temps chéto ché zu sul' plat, alors là i prenno l' tchiote poele espéciale du que ché quat' zu i zavotent du mau à avoir leur aisse
i metto ou plutot i j' to sin bure d' dins l' poele...m' mère ale li dijo presqu in suppliant "té veux pas qu' jel fasse Léonce ?"
alors là i faijo d' expret d' monter su ses grands bidets "ah nan, malheureusse, ti arrivero pas" , i s arprenno tout d'suite in dijant " pas comme mi"
à l' intinte fallo croire que chéto eune façon espéciale d' les faire cuire, en fait i metto pas mal (trop ) d' bure, pi i metto ché zeux d' dins et pi i armetto cha such' fourneau
là chéto eune mission délicate, pasque i voulo à la fo qu' ché zu i cuissent mais aussi qu' cha guile cor sur l' dessus
y a des coups chéto bin réussi, et là i appelo m'mère ou i faijo des rodomontades in arvenant del cuisine pour montrer am' mère commint qui avo bin réussi
mais chéto pas à chaque coup, suffiso qui artrouffe pu la loque qui utiliso pour mette autour dech' manche in fer del poele, pour qu in intinte d' abord des "pif paf pif paf "....
savez quand que ché zu aux plats i a pu d' bure in d' sous pour les cuire et là si in fait rin i vont accrocher dins l' poele ...
chéto bin sur suivi d un "meeeeeerte", pi d un "Odette ! (m' mère) du qu' ché qu' t a mis l' loque ?"
ouais i d' mindo am' mère du qu ale l avo misse el' loque pasque cha pouvo pas et' li, chef magasinier aux ateyiers centraux qui auro pu égarer le dit torchon ......
m' mère ale arrivo toudis tout d' suite comme si chéto l' samu qui interveno, ale ringeo vite fait sin arrosoir, ouais ale éto souvint ach' momint là in train d' arroser "la jungue" qui avo al' mason, j' dis la "jungue" vu l' nompe d' fleurs qu ale avo
donc ale arrivo tout d' suite, et ale li trouvo ch' torchon tout d' suite, meme qu un coup i éto su l épaule d' min père et i cacho après
croyez pas qu' min père i éto arconnaissant am'mère qu ale li artrouffe ch' torchon, pasque chéto , au fond, et in camuchant bin , toudis l' faute d' eme mère, et que si ché zeux i zétotent pas assez guilants ché qu ale éto arrivée pas assez vite .............
pas assez guilants ....et que dire quand que l' dessous y éto pu blanc ,mais complet'mint noir, et que dire quand que y a des coups ché zeux i faijotent autant d' finquées que si chéto des kippers ......
alors là chéto pas bon signe, pasque min père i éto tel'mint contint d' les minger, et qu au final chéto inmangeape ..... fallo pas commincher à faire d' l humour à ché momints là
merci minloute , ch'matin j'ai arvu min pére déjeuner dins l'cuisine .... pas avec des oeufs ,non, chétot pas s'n'habitute, mais avec sin café au lait , ses 2 tartines avec un morcieau d'fromache "Le Meilleur" et pis avec nott quien Pilou debout su ses pattes qui attindot li aussi un tiot bout d'tartine.
par maurice devos le, 27/05/2012bin té vos cor la t'em m'armets des souvenirs d'in m'tiête
comme j'ai travaillé longtemps in déplachemints, et toudis avec em'caravane, j'faijos m'popotte mi même
selon du'cqu'jétos,
Gravelines j'arvenos tous les samedis après l'boulot , au Bugey chétot tous les 3 semaines, etc, et j'arpartos toudis selon l'indrot, soit l'diminche soir soit l'lundi matin
et la j'arviens à chés zoués , passe que tous chés lundi soir, (pas l'diminche) chétos d'zoués d'su l'plat, et comme tin père j'mettos grammint d'burre, et j'lai laicho bin noirchir,chétot bin croustillant, cha croquot, cha funquot dur din l'caravane
et tout cha accompagné d'in tartine arcouvert din bonne couche ed' burre, miux qu'ché maxime, pi bin sur un tiot pinard
et bin souvint au plus tard, j'étos au pieu à 20h, et j'dormos jusqu'à 5h el lendemain matin comme un nourrichon, contint d'pouvoir récupèrer et satisfait d'ses esploits d'cuistot