le cap gris nez la suite

de boulogne , que j éto contint d' vire s'éloigner, in artrouvo en grante partie les grands espaces

la route commincho quand meme à m' sembler long, j' demindo souvint quand qu in allo vire l' fameux cap gris nez ...

grante déception in arrivant, i avo am' mote bin sur, pas tel'mint d' charme, ou plutot i semblo au premier abord, moins majestueux que ché falaisses blanques du cap blanc nez qu in voyo un peu plus haut

mais in sortant d' el carette, in éto souvint surpris par l' vint qui soufflo là haut

j' vous passe les " reste dans l' quemin" , " t approches pas" , "reste ichi" , "donne me la main"

donne me la main.... acoutez cha chéto l' pire qui pouvo ariver, pi donner la main alors que j éto djà un adolescent, enfin j approcho d' mes 10 ans ................... que honte quand qu in rencontro des zautes parints avec leu zinfants qui courrotent partout in toute liberté ...

cor heureux qui yavo mon mononque qui dijo que j' vienne avec li, que j' reste à ses cotés, sans donner la main va sans dire, et mi, tout contint j' li obéisso au doigt et à l oeil

quand qu in éto là haut, mon mononque i nous montro ché cotes inglaisses, pi i canto "quand qu on va chez léonce, on est onsse"

cha chéto eune phrasse qui faijo partie del canchon de not' fameux Raoul,"quand la mer monte"

in plus quand qui parlo dins l' canchon de "chez léonce" chéto un bistrot pas loin du cap gris nez

et bin sur chéto aussi eune allusion au prénom d' min père , que sin prénom chéto Léonce ............

d' là haut, du coté du phare, in arprenno l' carette pour s' garer un tchiot peu plus loin pour pouvoir déchinte à pied le long du cap gris nez et arjointe la plache

chéto pour mi eune grante joie d' pouvoir dévaler l' pente et aller juer sur la plache , mais là, grosse désillusion, l' plache ale éto envahie d'eune quantité gastronomique d' méduses d un bleu transparent bin trompeur

pas question d'courir sul' sape, m' mère am 'connaisso trop bin , j auro réussi à m'immeler les pieds et à querre d' sur ché bietes pas sympathiques

d'là , in armonto in carette et aprés avoir pris un bon bol d air, in arparto direction merlimont, qui m' paraisso et' à des années lumieres d ichi

au cours du retour, in s arreto toudis, j' pinse que chéto à boulogne, à un endroit , in surplombo la mer, et yavo des bouées accrochées au mur

la suite du voyage, j in voyo pas l' couleur, j ' in prenno chinq comme on dit, et ché seul'mint du coté d étaples que j ouvro un neule

j attindo avec impatience d arriver al' mason, pasque infant, j éto pas un grand voyageur, ou plutot j éto vraimint partageur, c est à dire que j avo des nausées in carette, bref j éto l' champion du dégobillache in carette

alors plus vite qu in éto artourné al' mason, que j' pouvo ouvrer l' portiere,sortir de ch t air un peu confiné du qu in sinto faut l' dire , toudis un peu l essence, plus vite que j artrouvo min dynamisme

ou comme diso m' mère " ya l' diape dins l' vinte" ....