sul'plache Marmottan

j'su armonté la semaine dernière en coup d' vint à bruay les berdoules
au cours d' mes périgrinations, j' me su artrouvé sul' plache marmottan du qui yavo ch' marché

j a voulu printe du r'cul et j ' m a approché d' la salle des fetes pour printe eune vue d ensempe

j' em' cale, j' ravisse à travers l objectif, et j intinds quéqu un qui susurre tout douch'mint " at' plache j' iro m' mette in haut des marches d' la salle des fetes, t aura cor eune meilleure vue"

j' ravisse autour d' mi, yavo pas personne, j' m a dis , cha y est minloute , té comminche à intinte des voix , ché l' comminch'ment d' la fin ...

j' arprinds m' n apparel et là en réglant ch' l objectif , j intinds "acoute me , té s'ra bin miu su ché marches"

là, j' m artourne cor et j' ravisse tout autour, parel , comme taleure , personne

j' allo arprinte m' n apparel quand que j intinds, " au lieu d' cacher autour d' ti, ravisse un tchiot peu au d' sus d' ti"

(photo 1)

j' leve m' tiete en m' demindant si j avo pas l' bleusse vue ou cor si j'révo pas ..

bin nan chéto bin l'estatue qui m' parlo, ché l' estatue de jules marmottan

jules marmottan, pour ceux qui saftent pas, y a été président du conseil général de la compagnie des mines de bruay entre 1862 et 1863 pi maire de bruay de 1870 a 1879

y a vraimint été à l origine du develop'mint d' bruay , en faijant construire ché cités du 2 et du 3 , pi ya fait construire pas mal d' batimints , comme des zécoles

j' m' artourne donc, j' vo jules, ouais in a vite sympathisé, qui m' fait un clin d eule

"escuse me" qui m' dit "j'te fais qu un clin d eule pasque sinan i pourro y avoir quéqu un qui pourro s in apercevoir

j' y a d'mindé commint cha allo mais yavo pas l' moral

"acoute min garchon, mi j a connu ichi l' plache du marché complet'mint remplie"

photo 2

"ch' marché i dégueulo d' partout, aussi bin vers la rue noyelles bin sur, mais aussi vers l' rue d amont pi d' l aute coté vers ch' viu bruay dins l' rue qu ale porte cor min nom asteure "

"pour et' dire fiu, in m avo mis au miyeu del plache, et là comme j' devo géner enfin j' supposse , in m a mis asteure à coté d' la salle des fetes

cha m a fait un coup té sait, mais bon , j' su devenu philosophe, avec les années qui passottent,j' su devenu moins connu, alors ché pour cha qu in m a mis ichi dinch' coin "

"asteure i pourrotent m' armette ichi au miyeu j' gén'ro point , vu ch' nompe d' marchands qui y a asteure"

"bon ché sur " qui arprint jules, " in est au mois d aout , cha fait qui ya cor moins d' marchands que d habitute

mais si té ravisse bin y a pu grinmint d' marchands d' légueumes, in tout cas pas des tchiots maraichers comme yavo dinch' temps, parel pour ché boucheries ou ché charcuteries ...

asteure ché grinmint d' vindeux d' vét'mints, d' bijoux, d'vidéos ou d'cd , enfin pu grinmint comme d' mon temps"

"ah si" qui dit " ya cor eune odeur qui m' rappelle l' temps du "grand marché" , tel' sint d ichi, ché l'odeur d' l ale feumé ......"

"ravisse me cha l' dallache " qui m' dit , "y a pratiqu'mint pu personne que che so en marchands , comme en clients"

photos 3 et 4

j y dit " j' sais bin Jules , ché eune pache, ché toute eune époque qu in a connu qui disparait"

avant d' partir , i m' dit "tiens , va faire des photos d' l églisse saint martin, ché pas d'main la veille qu in pourra in arfaire "

étonné et curieux, j a dit au r'voir à jules, li promettant d' venir discuter ch' bout d'gras avec li lors d' em prochaine armontée dins l' pas d' calais

de là j a artraversé l' plache à jules, pi j a été vire l églisse saint martin

les moins jeunes comme mi, i z ont même connu el marché qui armonto jusqu'in haut del rue des Escaliers, comme les étals del ducasse du 14 juillet aussi.

Et ou JPP, mais si mes souvenirs sont bons, ché z'étals d'el ducasse du 14 juillet n'ar'montotent pas jusqu'in haut d'el rue des Escaliers mais jusqu'à ch'café du stop in bas d'el rue Lamendin. Par conte ech marché y'armonto bin jusqu'au cercle par elle rue des Escaliers.
In dijo qu'ech marché chéto un des plus grands d'France. Y'a quiques années j'y avos été et y'avos toudis ech marchand ed tampons à la menthe pur passer sur tin front quand t'avos maux à t'tiête. Y'éto in face d'lancienne poissonnerie d'in l'rue Noyelle.