la poste suite
par minloute le, 21/08/2012d' abord , j'em souviens que l' porte d intrée ale éto pas légére, fallo souvint s' plaquer conte pour pousser avec sin corps pour l' ouvrir
j a l impression qu in rintro par la droite , in tout cas l intérieur éto fort sombre
d' dins cha grouillo, t avo toute eune série d' bureaux du que chéto marqué au d' sus d' quo y s occupotent
j'm' souviens aussi qu' min père i ralo quequ' fos, vous m' direz i ralo toudis ché vrai, i ralo conte ché gins qui étotent derriere ché guichets , aimapes comme des portes d' prison , quequ' fo, pour min père , trop tatillonnes dins certains cas
in tout cas meme si peut et' j exagère, chéto quand meme eune idée récurente vu qu asteure à la poste , ravisez bin, y a pratiqu'mint pu d' guichets, ché zimployés i sont plus aimapes, vous dire si ch est sincère in tout cas chéto nécessaire vu que la poste ale perdo des parts d' marché par rapport à ché banques, mais j' m égare et j arviens à bruay
des guichets j in a l' souvenir qui zétotent haut, que d' vant yavo tout l' long eune espéce d' tablette en marbre,d u qu' ché gins i déposotent chacun leu tour leur sac ou leu papiers pour expliquer leu cas au guich'tier
cha faijo un sacré brouhaha, ch' plafond y éto de forte hauteur alors cha faijo un bruit d' fond quand ché gins i parlotent
pasque savez dins ché corons , in avo l habitute d' parler fort, vu qu en plus yavo souvint la queue à ché guichets, si in preto tant soit peu l orele in savo tout ou presque de c' que chti qui éto d'vant ti i avo besoin ...
j a oublié d' vous dire, fallo pas y aller l' vendredi matin jur d' marché
mon diu que malheur, yavo des gins qui in profitotent pour déchinte au marché pour artirer à l avinche ou au r'tour d' l argent liquite
j a cor oublié , vous m' direz, faudro y pinser en temps et en heure, mais que voulez vous mi j'écris à l inspiration que dins ch' temps là , yavo pas d' guichets automatiques pour artirer s' n argent , cor moins l' possibilité d'acceder à son compte par l intermédiaire d'l arnitoile
in plus chéto la loterie en rintrant, té pouvo avoir tro personnes d' vant ti , suffijo qui n a qu eune sul'lot qu ale sorte 2 livrets ou qu ale comminche à faire d' zopérations d' versements par chi ou par là ...
in intindo parler d' carcome, d'pinsions, d' demantes en attente, bref , fallo et' patient
in plus d' tout cha, yavo ch' téléphone, alors là chéto tout un art, chéto pas tous les guichets qui s in occupotent, mais chéto des guichets du que souvint i s occupotent d' l invoi des colis
alors fallo et' diplomate , d'minder au guichet pi à ché gins si yavo du monte qui attindotent déjà pour ch' téléphone ..
pasque pas question d' rintrer dins zeune cabine, j a l' souvenir qui en avo au moins 2 ou 3 su la droite en rintrant, à confirmer mes gins , ptete aussi su la gauche
, pasque chéto l' guichetier ou guichetiere qui faijo ch' numéro pour ti
y a des coups fallo cor attinte vu que ché cabines ale zétotent djà occupées .....
alors t attindo sul' coté, pi à un momint quand que l' cabine as' libéro, quequ' zinstants aprés cha sonno dans zeune des cabines
l' guichetier i dijo du ginre "cabine 3 pour bajus" , alors chti qui avo d'mindé un numéro pour ch' te villache i savo que chéto sin tour
que brouhaha yavo dins ch' coin là, pasque parel, nous savez in a la réputation d' parler fort, pi escusez nous, in avo pas l' téléphone al' mason, et ch' téléphone cha avo quéquosse d' magique
alors là té pouvo suive en direque la conversation...... souvint en plus ché gins i rintrotent à deux dins l' cabine, ouais pasque l' femme fallo qu ale disse aussi un mot al'tante qu in appelo , ou qu ale écoute aussi l' conversation avec ch' l' écouteur
in téléphono rar'mint pour donner des nouvelles, nan in éto pas cor comme asteure à printe sin téléphone pour des babioles, j' vous parle meme pas des esseme messe ou texto d asteure , que dés qui s' passe l'moindre truc té vo ché jones papillonner su ché touches pour invoyer des tonnes d' informations pas forchémint essentielles
nan là in appelo pour d'minder des nouvelles si quéqu un y éto à l hopitane, ou pour tout c'qui necessito à la fo eune réponse plus rapite qu eune enveloppe timbrée, mais aussi moins pressant que l' fameux télégramme ..
fameux télégramme dit en passant et j ' la vérifié en ravisant dins ché papiers d' mes parints , qui servo souvint pour annoncer ché mauvaisses nouvelles
"oncle décédé hier au soir , enter'mint mardi prochain"
mais arveno au téléphone, y a des coups chéto aussi des bonnes nouvelles, alors ch' pitit y éto aussi dins l' cabine , j allo dire dins l aquarium, tout serré avec ses parints comme des saurets in caque
d ailleurs ch' gosse i s innuyo souvint ferme , l' temps que cha soit à li qu in passe ch' combiné, et cor chéto toute eune organisation pour li passer dans ch' t' espace si confiné
eune fo l' communication terminée, té voyo ché gins sortir del cabine, comme si i arvenotent dans l' monte réel, asteure fallo arfaire la queue pour payer ....
oh mes gins j allo oublier l' bruit caractéristique des tampons d oblitérations qui s abattotent régulier'mint d' plusieurs guichets quand qui yavo l obliteration ..............
sans compter que durant toute l attente à ché guichets in pouvo raviser sul' coté , sous un sous verre, les nouviaux timpes d' collection asteure disponipes ...
vlà mes gins in a fait un tour à la poste, bon asteure in va pousser l' porte d' droite et s' artrouver sul' perron et rintrer à sa mason
ché coups d'tampons dont i parle Minloute cha m'rappelle les différences de réactivité d'ché employés. Certains quand i tamponnotent cha faiso pinser à une mitraillette....mais certains autes entre l'1er tampon et pi l'2è t'avo l'temps d'aller boire un demi ach café in face.
I fo aussi savoir que l'directeur de laPoste i éto logé au-dessus, din un appartement immense, avec un balcon très large qui fait tout l'tour. Après l'départ de Denis Okupny, el dernier "patron" qui géro la totalité des services, ech l'appartement i devo ette désaffecté!!!Quand j'pinse que des gins i z ont pas d'logement!Après, el service courrier i é devenu indépendant du service commercial, avec un patron à chaque service : ché pour faire des économies et pour améliorer la logistique, ech courrier i arrive plus vite et ché timpes i coûtent moins cher...
( 1 photos)