ouf merci Aspro
par minloute le, 12/11/2012asteure quand qu in a mau as' tiete, y a pas que l aspirine, y a du paracétamol, pi bin d autes causses avec des noms plus ou moins emberlificotés, in tout cas in n' a plein
mi quand que j éto tchiot, in preno surtout du Aspro ...
chéto dans un espéce de tchiot sachet de couleur rose, du qui yavo un comprimé d' chaque coté
d'jà fallo printe l' paire d' ciseaux pour ouvrer un des cotés, pour pouvoir printe un des comprimés, fallo faire attention de pas ouvrer l aute coté du qui yavo l aute comprimé bin sur
ah chéto pas soluble, nan yauro fallu comme ché grands, l' met' dins s' bouque pi avaler cha ...
mi j y arrivo pas, alors m' mère ale s arringeo pour écraser ch' médicamint dans ch' fond du verre, pi ale rajoutto de l io pi un tchiot peu d' chuque, ale ayonno tout pi la cha s' passo vite
allez minloute , bo tout cha d un coup, allez
mi j' buvo mais savez ch' comprimé y avo pas forchémint bon gout , meme avec ch' chuque, comme un gout d' papier voyez
alors bin sur j' finisso pas complet'mint ch'verre et pourtant m' mère ale m avo incouragé
mi j arposo djà ch' verre, que m'mère ale rajoutto un tchiot peu d io , qu ale artouyo tout cha, et que j' devo cor m' arfarcir ch' fond du breuvache
Aspro, que sacrée marque, j' me souviens que quand que ch'tour de france y éto passé d'vant la maison , j' sais pu l année mais chéto un nommé vandekerkoffe qui avo gagné la veille ...
bin yavo eu des capios en papier qui avotent été distribués et min père i m in avo récupéré un d' capio in papier tout rose, avec la marque Aspro ......
ch'te marque qui éto omniprésente dans les années 60 , et ale avo un slogan que min père i s in servo souvint chéto " ouf merci aspro"
i dijo cha quand qui réussisso à faire quéquosse d' compliqué, ou quand que chéto eune bonne nouvelle