aut' souvenir d'el neiche 1

un aut' souvenir qui m a arvénu du temps del neiche à l école


in éto énervé, am' mote que ch' éto l' temps qui nous rindo comme cha ....... in arveno à l école pour l aprés midi, et nos manmans ale zavotent du mau à c' qu' on reste tranquile ...

autant yavo cor fait frod la veille, et qu in avo ker porter ch' cache nez, autant aujourd hui i fero presque caud ....

faut dire aussi que ch'ciel y éto plutot bizare, plutot laiteux, avec eune drole d' luminosité, "ch'est un temps à neiche cha", qu ale dizotent ché manmans, eune fo réunies d'vant ch' tiot portillon qui allo bintot ouvrer

cha y est ch' portillon i s' ouvro , in allo s' précipiter à l interieur, mais in éto artenu par nos manmans qui nous dijotent ché dernieres recommandations : "garte tin cache col, ouve pas tin mantiau.."

eune fo qu in éto laché à l interieur del cour, in allo su la gauche, du coté que nos mères ale pouvotent pas nous vire, et l' premiere cosse qu " in faijo , chéto bin sur d' ouvrer not' mantiau, d' artirer not' cache col, et del mette autour del tiete, comme ché zapaches i portotent un bandeau rouche

in éto géromino ou wanitou , et in pousso des wou wou, in passo l' main d'vatn la bouque

pour ceux qui s in doutotent pas cor, in leur dijo qui allo neiger avant c'soir, que ch' éto sur, que chéto l'sujet d'conversation des grantes personnes juste avant d' nous lacher dins l' cour

cha y est l' portillon y éto arfermé, et directemint yavo un mait' qui ayonno l' cloche

in filo vite fait d'vant l' grante porte du grand batimint du qu in allo rintrer, tout cha en s' mettant d' vant not' mait' respectif

bin sur pour nous calmer, i nous faijotent bin met' en rang, pour qu in s aligne bin , "bras tendus , fixe, revenez fixe"

yavo meme Mr Pruvost qui li nous parlo cor patois quand qui nous zingueulo, et i dijo in plus," allez saquez , bande d' briles "



on monto dins ché classes, et là ch' maite i commincho sin cours de leçons de choses

mi j' do avouer que cha a jamais été m' tasse d' thé , les leçons de choses...

mi, z'éprouvettes qu in faijo cauffer pour que l' bougie ale s éteinte avec ch' gaz carbonique , l'détal d' l apparel digestif dech' coulon , avec sin gésier , ou artenir l' nom d' tous ché zoches , radiusse cubitusse , péroné.....
j avo du mau à artenir tout cha

l' leçon as' déroulo cor normal'mint, jusqu à ch' momint du que ch' ciel y a vraimint cangé, y a d'venu d un seul coup plus lumineux, et pi aprés y a pris eune couleur gris foncé, qui annoncho rin d' bon

pour ceux qui suivotent ch' cours i s in sont apperchus quand que ch'maite y a ravisé dehors et qui a été alleumer ch' quinquet

alleumer l' leumiere comme cha in début d aprés midi , chéto bon signe pour nouzautes , cha pouvo que confirmer nos espérances ...