l' partie de belote d' Maurice

y a l ambiance ché sur qu in a tous connu cha, belote ou manille , avec d un coté ché beloteux et leur " belote et rebelote" et d' l aute coté ché manilleux et leur" manillon" et leur "je coinche" .........................

chéto souvint aprés un r'pas un moyen d' digérer.... in avo chacun ses zhabitutes, yavo des "paires " qui s'formotent naturel'mint ....

au delà d' ché souv'nirs là, mi cha m' rappelle les repas d' lend'main d' nouvelle année, pi ch' repas d' l anniversaire d'em grand mère , faut aussi raviser c' qui a su ché photos à Maurice ...

l' fameusse toile cirée, fierté d' ché ménageres, qu ale dijotent trop rin quand qui n a un rinverso sin verre , "ch'est rin ch' est fait pour cha ..." pi rapid'mint "arleve ché bords pour que cha coule pas à terre" .......

par conte gare à chti qui faijo un trou d' dins avec eune chinte d' cigarette, là cha rigolo plus .......

pi sul' tape ch' paquet d' bleu , ch' est du scaferlati supérieur, chéto l' toubaque préféré de georges brassens

souvint ché gins i finquotent ch' gris en cigarette, autant ch' bleu in' n a pas mal qui le finquote al' pipe .......

sans oublier ch' paquet d' gauloisses, pi ch' paquet d' gitanes ...

chéto cor l'temps du que ché zhommes i finquotent du tabac brun et que l' cigarette à bout jaune, chéto pour ché "gonzesses" ou pour ché files ....

ch' est vrai qu in ravisant cha in s'dit oh vinguette i devo y avoir eune sacrée finquée dins l' pieche ...et chéto tout naturel d' vire ché gins l' cigarette au bec

j a eu ker aussi raviser ché verres à pied , ch' cendrier emblatique que tout l' monte y a eu, ch' cendrier couleur jaune d' chez Ricard ...

sans oublier bin sur ché tasses d'café sul' coté .......

cha aussi cha s' perd asteure ....