21h30 au soir l' jour du Noël

21h30 au soir d' la noel, la vaisselle ale est faite, vous dire que j' pourro m étaler sur cht' affaire cha s'ro exagéré...

j' vous explique , j a toudis eu , et j a toujours un probleme avec l' vaisselle, suffit d y pinser, d' l évoquer , et d un coup j a comme des fourmis qui m arriffent dins ché dogts, qui m empechent d' printe bin en main un torchon et cor moins eune assiette ou un couvert à essuyer ...

certains diront que ché psicomachinchosse, in tout cas ché inguérissape, donc cha fait d'zannées que, malgré mi, j' passe la mort dans l ame , min tour pour faire la vaisselle

si si, j a quand meme des souvenirs, comme ch' jur là in avo sorti la belle vaisselle, les bios couverts del belle ménagère, ch' bio plat à fromache, ché plats en inosque, souvint mes soeurs ale demindotent am' mère "du qu' chach' ringe cha ?"

souvint d ailleurs chéto dans l' placard del pieche d' devant qu in ringeo tout cha, cor fallo trouver l' bon tiroir ou l' bonne porte ....


mi j éto réquisitionné avec min père pour ardonner al' pieche d' devant s' n ' aspect qu ale avo tout l' reste d' l année

faut dire que dès l' matin in avo bougé ché meupes, artiré ch'bureau à min père, ramené une grante tape al' plache, sans compter ché cayelles, l' nappe in papier , pi tout l' reste que j' vous laisse imaginer ...

on ardonno donc al' pieche d'devant l aspect qu ale avo tout l' reste d' l année, ch' bureau à min père face al' farniete, l' tape et les cayelles du qu in éto mal assis , sans oublier ch'grand meupe vaisselier et ché pots d' fleurs

quand que mes soeurs et m'mère ale zétotent al' vaisselle, nous avec min père, in devo arpasser l' tape dans l' aute pieche, pi ché cayelles etc etc

alors cha pouvo bin s' passer, ou cha pouvo et' la catastrophe

savez in l' sinto , chéto commint qu' min père i pouvo réagir si yavo d" zimprévus

un imprévu ch est si in avo pris l' grante tape et qu in l avo misse sul' coté et qu in l' arcangeo d' pieche et que là , cha coincho, pire cha buquo...

mon diu, si in avo l' malheur d' buquer ché meupes su ché coins d'portes ou d' murs , in l intindo passer

d' toute fachon, chéto d' not' faute pasqu in raviso pas c' qu in faijo, ou alors in l acouto pas, ou in faijo pas attintion à li et que min père i éto obligé d' nous suiffe et ch est comme cha que li i buquo à sin tour ché meupes, mais que chéto pas des' faute ..........

autre imprévu si quand qu in éto dans l'phase critique qu in porto l' tape, yavo m'mère qui s'metto dans l' passache et qui dijo " cha va léonce ?"

alors là , ale avo dro à eune réponse nette et rapite, que si ale comprenno pas, ale avo interet à pas rester dins l' passache

cor pire , si ale avo armis ché pots d' fleurs dins l' passache et que nous in arrivo avec l' lourte tape in bo fabriquée y a bin près d' cinquante ans par mononque maurice ...

aut' faute graffe, si mes soeurs mais surtout m' mère ale voulo passer pour aller ranger des couverts dins l' meupe d' el pieche d' devant et que nous in arrivo tout concentré entre ch' couloir et la porte du salon ...........

comme un gout un tchiot peu amer, un début d' mélancolie, in avo l'dro d' suive la fin du flime qui passo al' télé pour les plus vaillants, tandis que m'mère , j' do dis mère courache dins ché momints là, ale allo s' couquer tel'mint qu ale éto mate des' journée

faut dire que cha faijo quequ'jurs qu ale pinso qu au déroul'mint du r'pas
est ce que cha allo bin s'passer, l' cuisson del dinte ale s'ra ti bonne, i n aura ti assez pour ché gins, pi tout autant ale avo pas ker d' vire ché meupes del mason canger d' plache

et j' do dire aussi supporter l' pression qu' min père i li metto, li qui s occupo surtout d aller chercher et ram'ner ché vieles personnes, s occuper des boissons, pi d' découper l' dinte avant del' servir .......

ale reflexion ale avo un sacré courache

mi tout cha , cha m' passo bin au d'sus d' mi , mi j' voyo surtout que noel chéto presque derriere mi , sur qui yavo la joie d avoir ché juets , mais yavo pu la magie d' l attente

ou plutot in oso meme pas y pinser, faudra cor attinte un an pour arvire ché memes momints


là j' va vous quitter, pasque .... y est 19h19 ....et que j a faim ...

"si té veux mingez teut' demerte , ché dans l' frigo"

ah cha cange du temps d' min père, j' arrete pasque ché féministes ale vont raler ......