le grenier, pi rimballache

autant chéto avec plaiji que j attindo m' mère in bas de l escayer au début des vagances d' noel ...

ouais j' va m attarder un tchiot peu, j attindo pas m' mère dins ch' couloir du haut , cor que, attindez j' arprinds à zéro

quand que chéto l' tout début des vagances, savez quand la noel ché cor dans quequ'jurs, à la fois si proche et si loin ...... fallo nous occuper

donc m' mère ale monto au grenier , pour aller querre ché décorations d' la noel

mi j' avo pas l'dro d'monter au grenier, enfin j avo commint dire un accord tacite avec m' mère, j avo l'dro d' raviser par l' porte qui meno ach' grenier, mais chéto tout

faut dire aussi que ch'grenier ch'éto pour mi un endro j allo dire "magique" mais dans tous ché sens, j auro miu fait d'dire "mystèrieux"

d'abord durant l année , chte porte chéto interdit d' l ouvrer et d'monter in haut, mais savez in in éto, j in éto djà découragé par mi meme, suffijo par exempe que j'so dins min lit, un soir d' grand vint, et la porte du grenier pour mi, ach' momint là , chéto vraimint la porte qui m' séparo d' élémints forchémint hostiles .....

souv'nez vous, tout éfant, tout seu à l étache, dins vot' lit, ché parints cor in bas, mais ché comme chi i zétotent à l'aute bout d' la terre, vu qui zavotent freumé la porte qui meno du salon ach' couloir du qui yavo l escayer qui mono à ché chambes

pi parel, eune fos dins vot' lit comme j' dijo un soir d' grand vint, savez ché soirs du qu in intindo l' io v'nir fouetter par momint ché vitres ...

les soirs du que ché branques du peuplier qui éto juste à coté del mason, que ché branques ale barloquotent grinmint...

les soirs du qu in intindo de derriere l' porte du grenier, le souffle du vint diront certains, l appel d' monstres dirotent ché zéfants

mi j' me souviens et' dins min lit et intinte ch' vint siffler par l' trol d' la serrure, comme si chéto un chant d' sirènes, j' avo l impression d intinte des voix qui faijotent "wooooooooooooooooooooooooo woooooooooooooooooooooooooooooo"

sans oublier in plus ché zappels d air qui faijotent bouger l' porte, comme si derriere comme j' dijo taleure, yavo des monstres qui essayottent d' tourner l' poignée, ou in tout cas qui s appuyotent sul' porte pour qu ale cède et que cha la faijo aussi trenner sur plache

mon diu que j' dijo , pourvu que l' porte al' tienne ...

m' délivrance, ouais pasque croyez pas que j' m éto indormi d'puis que m' mère ale m avo mis au lit, m' délivrance chéto quand que j intindo l' porte du bas s' ouvrer, cha voulo dire qu' mes parints allotent s' couquer, alors là, j éto rassuré...

pasque , dans l' tiete d un tchiot d' 6 ans, sin papa et sa manman, bin y a rin d' plus fort au monte .....