le grenier pi rimballache suite
par minloute le, 01/01/2013aute particularité du grenier, zallez dire commint que té peux l' savoir minloute si t avo pas dro d y monter ..
ch'est que avec l age, oh pas tel'mint d années aprés, in d'vient plus téméraire, et in veut connaite ché limites du territoire
alors in profite que ch' père y est pas là, et que l' mère ale parte pour querre ch' pain ou étende ch' linche dins ch' gardin et in monte à l étache
ch' est la que comminche un monte étrange..............
tout d' abord l' poignée, ale tourno dinch' vite, et pour qu ale ouffe l' porte fallo l' tourner complet'mint su la gauche et là, d un coup sec, cha devo s ouvrir
j' dis cha devro s ouvrir, vu que j' sais pas si cha faijo caisson , ou si chéto l' fait que l' porte ale éto pas souvint ouverte, fallo souvint cor saquer un bon coup sul' porte pour qu ale souve
bin sur , comme ché voleurs, in attindo un tchiot peu, in avo l impression qu in avo fait un boucan du diape qui avo du s intinte jusqu au bout d' la rue leverrier
pi savez , eune fo l' porte ouverte, chéto l' début des zinterdits
c' qui cangeo aussi, eune fos l' porte ouverte, chéto l' grandeur des marches, ale zétotent bin plus grantes que celles qui menotent du rez de chaussée à ché champes ...
sans compter qu' min père i avo mis in plache au d'sus du début d' la montée, un bricolache des' spécialité, eune espèce de toit avec des planques et un bout d' toile cirée pour éviter qui y a trop d' poussieres su ché premieres marches d ' l escayer
au delà d' la poussiere, ouais fallo pas oublier d' pas trop trainer ses vet'mints, un coup j' m éto fait attraper pasque j avo dins min dos eune toil' d araignée plein d' poussiere qui éto la signature meme de m' incursion dins ch' t indro interdit ....
au delà des toiles d araignées, chéto les araignées par elles meme qui m éffrayotent, j in a eu longtimps eune sainte horreur
c' qui cangeo aussi, eune fo qu on monto avec attention ché marches, et qu in avo tous ché sens d éveillé, chéto qu on sinto d un coup à la fois ch' courant d air qui v'no de d'sous les tuiles, pi aussi l' bruit d' la circulation des carettes qui yavo rue anatole france
in arrivo enfin ach' palier et là y avo eune aut' porte, pour acceder à eune pieche, qui donno par eune grante lucarne sur la route nationale
j avo toudis eune appréhension à l ' ouvrer ch'te porte vu que m' mère ale m avo dit,que ché locataires d avant, j' vous parle d' cha d un temps immémorial pour mi à l époque , ch'est à dire avant 1949, que ché anciens locataires, i zavotent eune femme d' ménache, et que , et cha révolto m' mère, qu in li avo aménagé s' champe dans chte fameusse pieche au grenier
j avo donc toudis eune tchiote appréhension , qui éto dominée par m n invie d' braver les zinterdits , quand que j ouvro l' porte de chte pieche
j avo ker y aller pour raviser par l' farniete qui éto presque à hauteur du plancher, ché gins qui passotent tout in bas such' trottoir d in face
quequ'fo des gins que j' connaisso bin , souvint d' vue, avec l' plaiji d' pouvoir mi les vire et eux qui pouvotent te pas s' douter que j éto en train d' les raviser ....