malate suite
par minloute le, 03/01/2013donc l' matinée as' passe tranquil'mint, mi j' su installé dins ch' fauteuil en osier qui a près del farniete, d'là j' vo m'mère s' dém'ner pour faire à minger
partir faire ché courses, bin s habiller caud'mint, et finir par l' tchiote capuche en plastique transparent, vu que dehors i continue à neiger tout douch'mint
fait attintion à ti qui dit min père , ch' est pas l' momint det' ramasser
eune demie heure plus tard ale arvient des courses, pose ch' cabas à terre, raconte à min père les péripéties des' sortie, l' monte qui attindo dins ché magasins, ché gins qu ale avo croisée etc etc
j' el vo cor déposer sul' tape des vieles paches d' journal, mette d un coté ché légueumes acatés juste avant, in plus du premier voyache qu ale faijo al' caffe
j' vous rappelle que chéto un temps du qui avo pas cor ch' frigidaire, qu am' mote in a du avoir pas longtimps après
donc chéto que d'zallées et v'nues entre l'cuisine et l' caffe, à aller querre ché pétotes, pi aprés l' grante marmite qui éto posée sur eune étagère qui yavo au coin , à mi déchinte
là ale sorto sin "économe" et là ale éplucho ché légueumes , tout cha pour faire un pot au feu
eune fo tous ché légueumes mis dins l' marmite qui éto such' fourneau dans l arriere cuisine , ale regroupo ché zépluchures au miyau des journeaux, ale rabatto ché bords pi ale sorto pour mette tout cha , in vitesse, dins l' lessiveusse qui servo d' poubelle
l' matinée as' passo, m' mère as' demindo si ch' docteur i nous zavo pas oublié, mais nan qui dijo min père, vu ch' temps i do et' débordé
in s' met à tape, mi j' minche pas grand cosse j a invie de rin, in s attindo d' tout' façon à c' que ch' docteur i vienne au miu en miyeu d aprés midi et vlà ti pas que cha buque al' porte ...
branle bas de combat, tout l'monte i s' leffe précipitamint, min père i s essuye à peine l' bouque, m'mère ale est djà al' porte, et là ch'est l' docteur qui arriffe ...
devo et' tout juste midi et d' mie
ch' docteur i rintro al' mason avec un grand courant d air frod et avec sur sin pal'teau l'humidité del neiche qui avo qué d' sur
d un coté ch' docteur i éto comme géné d' vénir comme cha , à brule pourpoint ,i veno juste d' finir d expédier ché visites du dispensaire, et i continuo entre midi et deux heures eune partie des visites à domicile qui avo pas fini au matin
et comme i dijo , vu l' temps qui fait, j in a cor grinmint à faire ch' t aprés midi
autant ch'docteur i éto comme géné d arriver un peu à l improvisse , in dehors des zhoraires qu on auro pu l attinte, un peu comme un caveu dans la soupe, meme si ch éto un bouillon qu in mingeo ....
autant mes parints étotent comme génés aussi que ch' docteur i arriffe quand qui minchent, comme si i zaurotent pu deviner qui allo arriver , comme si i zétotent pris en flagrant délit d' pas l attinte ....