em' champe ed'gamin

in 1948 mes parints y z'ont déménagés , d'el fosse 12 , d'un viux corons ed'5 masons , pour aller rester din l'nouvielle cité des fleurs , mais vraimint des masons tous neufs , avec salle ed' bain "sans baignoire" et bin sur pas d'ieau caute

din ch'te mason yavot 3 champes , et un étot à l'époque 6 files "dont in adoptée" et 2 garchons, min tiot frère "ech'culot" comme in dijot yétot pas cor né , fallot bin mette tout cha quête part

bin min père ya trouvé l'idée , et avec ses tiots moyens , bin ya fait in champe d'in ch'garnier , alors bin sur pas d'chauffache , y n'd'avot d'ja pas din chés vrais champes , pour yaller fallot printe ech'2eme escalier , in arrivot al porte et la cha faijot in 1ere pièche ed' 10 a 15 mètes carrés, pas d'farniète bin sur , seulemint un tiot lanterneau ed' 40x20 cms

din l'fond d'el pièche min père yavot mis, cloé d'su ches bastings des tôles plates in "fibro , amiante suremint" d'su l'droite au mitant d'ech'mur in porte qui donnot d'su in pièche grammint plus grante, avec , vue la aussi directemint d'su chés tuiles , pas d'isolation bin sur

et l'nec plus ultra comme in dit ach'teur , ech'plancher des bastings , du bos brut , fallot pas marcher à pied d'cauche , avec chés épines cha craignot , j'em rappelle pu sin min père, yavot mis d'el lumière , y sempe qu'ech'vos cor in ampoule ach'plafond et in poire al tiète ed' nous lit à min grand frère et à mi

pour l'hiver j'ai pas d'souvenir d'avoir eu frod , du moins in fos pas d'sous chés couvrantes , et in édredon in plumes qui vénot d'em'grand mère , bin sur em'mère ou mi d'ailleurs in récauffot chés draps , soit avec chés viux fers à arpasser qui avotent passés le journée din ch'four , soit avec des briques réfractaires qui vnotent d'ech'four aussi

et cha a duré comme cha jusqu'à c'qui n'da qui s'décitent à s' marier , et ch'cros qu'j'ai pu abandonner min palace pour in bielle champe un tiot peu avant d'partir à l'armée , bin j'vas vous avouer mes gins , qu'min garnier yétot grammint plus confortape qu'chés callots d'ech'djébel, j'ai pas d'photo bin sur d'el champe , mais in qu'ya été faite ya 2 ou 3 ans , maison rénovée , mais suremint pas l'champe

j'ai oublié ed'dire , quand j'etos jones , j'étos un tiot peu somnanbule , et souvint j'm'artrouvos din l'deuxième pièche d'ech'grenier donc a coté d'em'champe , din l'noir complet et j'avos bin souvint m'tiète qui cognot conte chés bastaings d'el toiture

et pi un souvenir qui ma arvénu , yavot in gampe ed'bos d'accroché à chés bastaings , cha s'appelle "un pilon" comme chés corsaires , cha venot d'in onc am'mère qu'yavot été blessé "civil ou militaire" pindint el'guerre 14/18 , j'ai connu ch'pilon , mais pas ch'ti qu'il portot
ché bizarre comme des tiots détals comme cha y peuvtent armonter al surface apres tant d'années , rin qu'in arparlant d'MIN garnier.

et pi aussi , chés masons qu'in vot din l'fopnd derrière el'notre , y etotent seulemint in constructions à l'époque , in allot juer en'dins , chétot formidape , sinan chétot cor tout terrain vague , in avot d'el'plache , in plus d'el rue bin sur, qui pour ainsi dire nous appartenot