les tchiens roquets , eune belle histoire
par minloute le, 16/06/2013dins ché corons in trouvo souvint l' meme type d' chiens, in appelo cha indiféramint des roquets ou des ratiers
poils courts, toudis in mouv'mint,j' me souviens que chéto un d'nos jeux d' les zénerver quand qu in passo dins ché corons
souvint suffiso d' faire un tchiot peu d' bruits et in les intindo aboyer dins ché courettes ...
pour ché plus méchants , in faijo exprès de stationner intre ché masons , du qui avo l' porte qui meno al' courée , qui donno sul' cuisine, pi en enfilate ,l' buanderie, ché barraques, pi enfin l' tchiote porte qui permetto d acceder au gardin
ché plus vindicatifs in les énervo et in avo ker vire passer leur musiau artroussé , pour qui nous montent leurs plus belles dints , au niveau de dessous l' porte
in resto pas longtimps, pasque si chtien i s énervo , sin maite aussi, et in filo vite dès qu in voyo l' clinche del porte tourner ...
viux souv'nir d infance...mais voyez ch est pas par là que j' voulo commincher min sujet j' éto in train d' busier am' grand mère ..
m' grand mère ale véno minger tous les diminches al' mason, et comme diro l aute " ale avo un avis sur tout"
fallo qu ale fasse souvint eune armarque, j' diro plutot qu ale "parlo tout haut" comme on dit par chez nous ....
Mémé, quand qu ale véno al' mason as' metto toudis al' meme plache, fallo li mette eune caielle pas loin dech' radiateur, dins l' salon, j allo dire presque dins ch' passache, que quand té circulo dins l' mason té passo toudis d' vant elle ...
s' n expression que j avo ker ch'éto à propos du tchien qu in avo , un tchien qu in avo récupéré errant dans la rue, et ch'tien là, m' mère si ale allo al' caffe, ch'tien i l accompagno jusqu à ché zescayers ...
ale arparto al'cuisine, l' tchien i yartourno dins sin panier , mais i resto toudis à guetter
c'que j' voulo dire , tel' croyo indormi, m'mère ale passo, clac, ch' tien i s' levo pour l' suiffe
i faijo toudis cha, et comme m' grand mère ale veno chaque semaine , in avo dro quand que m' mère passo avec l' tchien derriere elle à "vla Saint Roch et sin tchien" ...
j' avo d'mindé am' grand mère du que cha veno s' t expression , ale m avo dit que chéto un saint qui avo toudis un tchien avec li ...
mi qui a ker taquiner, quand que m'mère al' passo avec ch' tien, avant que m' grand mère ale puisse dire la phrasse , j'el dijo avant elle, tout en imitant s' pitite voix...
alors là j avo dro à eune aute expression des' part , chéto "innochint".......
pour in finir avec Saint Roch, bin ch'est sin nom, qui a été donné à eune sorte d' tchien...le roquet ..
étonnant non...