A comme angouche
par minloute le, 27/06/2013quand que Clara ale véno al' mason, Clara l' cousine à min père, in l' voyo arriver ale barloquo d' gauche à droite avec ses cabas
eune fos l' porte ouverte, ale soufflo un grand coup, ale s asseyo pas, ale ouvro ses cabas du qu ale arsorto un kilo d oranches, eune boite d' dattes, des pommes, mais toudis in tout cas, un lit' d' jus d'raisin de marque chaland, j' su pas sur d' l orthographe
après ale s asseyo d un coup sul' cayelle, i li fallo bin eune mineute pour s in armette
m' mère ale li dijo que chéto pas la peine des' carquer comme cha pour aller chez les gins, qu ale alo i laissser s' santé
ale pouvo toudis l' dire à Clara, mais comme ale éto toudis par monts et par vaux et toudis à pied, d' es' mason rue florent evrart, qu ale allo jusqu' àle cité 30 pour vire des neveux à elle, ou quand qu ale nous raconto ses itinéraires del jurnée dans bruay, à forche d aller au dispensaire, d arvénir, d apartir al' framacie mutualiste, d ardéchinte au marché, d armonter , d aller apporter des courses à untel ou eune telle , ale arrivo al' mason ale éto mate
et in plus pour "s' définte" ale raconto ses miséres " ravisez min pied Odette, y a cor enflé", ou "cha suppure toudis un peu" , ou "savez pas combien que j' fais d' tension Odette" , sans oublier " j a été sur ch' marché mais yavo pas m' taille, alors i va m in commander , pasque y a qu' avec ché chaussures là que j' peux cor bin avincher"
mi j avo 10 ans, et à acouter , meme d eune orele pas toudis attentive, à forche, "j' connaisso la canchon" quand que Clara nous raconto ses misères d' santé, j avo oublié l' fameusse "artrossse" , pi qu ale devo canger d' paires d' leunettes, qu ale craigno des' faire opérer d' la "cataraque" ,ouais ch'est un truc aux zeules ....
y avo un terme que j avo d'mindé à min vigin qui éto dins sin gardin quo que cha voulo bin dire...
Clara ale dijo souvint " ah j a eune d'ces zangouches dins min bras" chéto les bras , mais cha pouvo et' les zortiaux aussi
"eune angouche ?" qui dijo ch' vigin , comme si chéto évident "té conno pas cha?" bin nan , "bin vinguette" qui dijo, à accroire que sin in connaisso pas sin patois in éto pas comme es'zautes ....
et là y hausso l' temps " eune angouche ch'est avoir mau quequ' part " j' l armercio quand meme, li i devo s'dire , "min pauv' garchon qui conno pas tout cha"...
in tout cas , i pourro vire qu asteure que ch'est mi qui a repris ch' flambeau dins ch' parlache en patois
pour in arvenir à Clara j' me d'mindo mi qui éto tout tchiot commint que Clara ale a pu et' jeune vu que j' la toudis connu j allo dire "handicapée", pi avec des bandaches d'momies sur ses gampes in d'sous d' ses bas ............