faut pas toudis tout répéter

quand que j éto jone, j' éto un peu la "caisse d' résonnance" d' min frère
faut dire aussi qui yavo plus d' 14 ans d écart intre nous

min frère i rhabillo vite ché gins, " que con" pour chtilale, et cor cha j' comprenno qui fallo pas l 'répéter , mais y a des coups que pour mi, j' voyo pas à mal et j' répéto , alors qui fallo pas

yavo eune dame dins l' rue , i l appello "roquépine" quand qu ale passo à vélo , in éto à tape , et min frère in l' voyo passer "p'pa, y a roquépine qui arpasse" ..

min père li dijo souvint d' pas dire cha, m' mère en écho ale préciso "oublie pas tin frère i répéte tout"

rin que quand qu ale dijo cha m' mère , ale avo tout faux, j' avo l impression qu ame rabaisso, qu ame prenno pour un tout jone , ale avo raison d ailleurs, alors que min frère i s in sorto toudis par eune pirouette, so en rigolant, so en dijant " mais ch' jone i sait bien qui faut pas l' répéter"

ch' jone chéto l' surnom qui m' donno ...


j' va vous zarmette dins ch' contexte, in avo au bout del rue , un couple que commint qu in pourro dire, i zétotent un peu "étrange"

li yéto aimape comme eune porte d' prison , comme diro m' mère, gapette toudis vissée sus' tiete, un air qu in auro dit que rin qu à nous raviser cha l' faijo tchier ....

avec comme si yavo toudis des zeules au beurre noir , mi j' pinso qui s' lavo pas souvint ...

li sin surnom chéto "monsieur Malaimape" mais zinquiétez j y auro jamais dit ...

quant à s' garnoule, ch'est elle que min frère avo appelé roquépine

savez durant les années 60, roquépine chéto eune sacrée vedette, relayée al' télé par léon zitrone, pisque roquépine chéto un bidet , et plus précisémint, eune jumint , et cor plus précisémint , ale a dominé durant plusieurs années le trot mondial ....

donc "roquépine" enfin celle del' rue , ale passo souvint à vélo et j in a djà parlé un coup, in s' demindo commint qu ale tenno d' sur ...

acoutez ,chte dame chéto d abord "eune grande bringue" , zavez vu ché surnoms i fleurissent , chéto eune dame toute maigue , grante, presque décharnée qu in pourro dire

et quand qu ale passo à vélo , ale raviso dro d' vant elle, à ignorer volontair'mint ché gins such' trottoir sin' n avo ...

in tout cas aussi sociape qu' sin homme ...

quand qu ale passo, perchée su sin grand vélo, ale tourno à peine les gampes , et j' craigno à chaque coup d' pédalache qu ale qué à terre tel' mint qu ale avincho pas vite

sans oublier qu ale avo un visache, un peu "chevalin" , qu ale arsemblo un peu à Fernandel , avec les dints qui courrotent après l' viante ....

zavez vu ichi l' tableau....

et un jur, porté par mon enthousiasme, in plus min frère i éto al' mason, vlà ti pas qu ale passe dins l' rue ...

mi , j' cours du gardin al' mason, in criant eune paire d' coups "vla roquépine , vla roquépine" ...


j' sais pas c' qui m avo pris ch' jur là .......

alors j a vu qu ale avo intindu et qu ale avo pas apprécié , mais cha chéto arrété là..

enfin cha ch' est arrété là, jusqu au lend'main que min père en allant à sin gardin au bout del rue avec s' brouette, i a intindu parler du pays par ch' l homme qui attindo sin passache

au r'pas du soir, j' m a fait ingueuler , min frère aussi....
et bin sur tout y a arqué à la fin sur mi......
cha m a servi d' leçon.... par la suite, j a bin fait attintion à pu l' crier quand qu ale passo d'vant l' mason...

mais voyez, "ché conneries là" comme diro min père, bin plus d' 40 ans après j' me souviens cor du nom dech' bidet d' course ....