histoire d' pomme et d' coutiau
par minloute le, 29/08/2013la roue tourne mes gins, in s in rind pas compte tout d' suite, ou in veut pas s' l avouer, pi un jur cha vous arriffe dins l' guiffe que l avez pas vu arriver ...
j' vous a djà raconté, au détour d eune histoire, l' plaiji que j avo quand que m' mère am'dijo d apporter sin gouter à min père, au bout del rue, dins ché camps , comme in dijo , et qui étotent in fait que des parcelles d' gardins que certains cultivotent in plus d' leu gardin personnel ...
j' éto dins les startine bloques quand que m' mère ale m avo laissé intinte que j allo pouvoir li apporter sin gouter
oh j' savo djà les consignes : curt pas sul' route, fait attintion en traversant, ravisse bin du qu' té va (j avo eune tendance à querre souvint à terre ..), fait attintion y a un coutiau dans l' musette ....
ouais ouais que j' dijo am' mère , qui m accompagno jusqu al' porte del mason pour m' laisser partir tout au bout del rue
d abord j' marcho douch'mint, pi d' plus en plus vite, j' avo traversé , j éto such' bon trottoir, alors m' mère ale rintro ale mason et mi , à forche d avincher dins l' rue, j' accéléro l' pas, j' passo d' la marche , au trot, pi au galop
j sauto au d'sus d' ché caniveaux comme si chéto des rivières, j éto zorro qui conduiso sin bidet tornado dans eune course éffreinée ...
faut dire que cha m éto arrivé , d' vire min père déboucher du bout du ch' min avec s' brouette, et qui rintro plus tot que prévu
j éto à la fo pas contint conte m' mère qui m avo pour mi pas "laché" assez vite, et pas contint conte min père qui éto armonté trop vite
nan, cha y est in arriffe au bout del rue, j arrete min bidet d eune main ferme , ouf, j' el vo in bas, bin loin , cor courbé dins ses routes, i m a pas vu ...
alors là , j linço min fidèle coursier dins l' déchinte, c' qui m impécho pas d'dire bonjur à grand père poulvin qui avo sin camp avant d' chti d' min père, sans quo j auro eu dro in armontant à " vot' garchon i m a pas dit bonjour" ...
j avo ker arrivé par surprisse, ou alors min père i faijo l étonné , j y ameno sin gouter, malheureux, j' savo qui fallo que j' reste sul' haut du champ , et pas courir comme un ébeulé vers li à travers ché porions et ché pétotes ......
j attindo souvint deux mineutes, l' temps qui finisse d' biner eune rangée pi i v'no s assire sul' chemin, i choisisso un indro in hauteur, pour qui puisse s arléver cor facil'mint vu qui avo eune gampe raite ....