aventure dins ché dunes
par minloute le, 29/09/2013plus grands, quand qu in avo eune douzaine d années, in pouvo aller juer seuls là haut dins ché dunes ...
quand qu in y arpinse...asteure avec tout c'qu on sait , avec toutes ché zhistoires qui y a , in osero pu laisser ses éfants aller juer tout seu au miyeu d' nulle part ...
comme j' l a djà dit dans un aut' sujet, in sorto souvint par l' maison d' mon mononque et d'là in accédo rapid'mint à un sentier qui permetto d' monter dins ché dunes, chéto du qui yavo dans l' temps ché terrains d' tennis
eune fos là haut , sul' premiere crète , in éto pu des zéfants, in éto souvint des cowboyes qu in devo s' méfier d' ché zindiens
faut dire aussi que quand qui faijo pas bio à Merlimont, in lijo , in arlijo les tchiots liffes de bandes dessinées, in noir et blanc, avec bin sur comme héros Akim, Blek le Roc, Tex Jones, Tex Bill, Ivanohé, X 13, Kit Karson
eune fo là haut su ché cretes, in éto in territoire ennemi, in s' faufilo l' long des cretes pour pas qu in nous vo, in courro d' cache in cache, et à chaque coup, in s arreto, coeur battant, à attinte d arprinte not' respiration, et d' jeter un eule à travers ché bouquets d oyats, pour vire si not' itinéraire éto dégagé, et si yavo pas d' traces d indiens dans les paraches
faut dire qu à ch' t époque là, ché dunes ale zétotent cor bin hautes, oh savez ch' est pas seul'mint eune histoire d' souvenirs qu in pouvo vire ché chosses plus grantes qu ale n étottent , mais ench' temps là, j' me souviens que quand qu in arvéno de Stella à Merlimont par ché dunes, in voyo l' clocher d' Merlimont à l avant derniere dune ...
asteure dès l' départ, tel' vo, faut dire qu inter temps in a construit un camping entre ché deux estations, pi y a eu des constructions que cha a pas aidé à c'que l' sape i reste in plache
in avo un parcours privilégié, in passo derrière un certain nompe de tchiots sommets, qu in leur avo donné un nom, savez ch'eto comme dins ché westerns..........., là in imagino que commincho l' territoire de telle tribu, amie mais l' plus souvint ennemie .......
et in passo dans un vallon, du qui yavo plein d' arpes épineux, ch'est l' sujet d avant qui m y a fait arpinsé, un coup qu in éto làhaut , in a vu qui yavo un cerf volant qui éto coinché au miyeu d' ché zarbustes là, et in avo réussi à trouver un ch'min ou plutot am'mote chéto un ancien ch'min qui avo été arcouvert par ché zarbustes, mais en rampant, in avo réussi à progresser et à traverser chte zone là, sans atteinde par ailleurs ch' fameux cerf volant
in tout cas chéto pour nouzautes eune vraie aventure d' ramper in d' sous comme cha, comme si in echappo à des patrouilles d éclaireurs indiens
faut dire aussi, qu' à cht époque là, in connaisso eune bonne partie des tribus indiennes, des Corbeaux ou Crow, les cheyennes et les sioux, mais nous dins ché dunes chéto un peu comme dinch' désert , in combatto ché zapaches
faut dire aussi qu in avo eu dro à aller au cinéma à merlimont et qu in avo vu un flime de winetou, chéto un héros indien du début des années 60
d' là , in avo le rio grande à traverser, zone dangereusse, pasque zone découverte, du qu on pouvo et' la proie facile de nos ennemis ...
en fait de rio grande, chéto l' ruisseau d évacuation des eaux usées de Garden Plage, l estation qui a jamais complet'mint vu le jur inter Merlimont et Stella ..
chéto pas toudis ragoutant à traverser, yavo grinmint d' bouteles plastiques qui i trainotent, asteure tout cha cha do pu exister , i sont quand meme plus ravisant conte ché pollutions comme cha ....
d' là in monto sur eune dune qu ale éto pas commote, in devo meme s accrocher à ché oyats, mais eune fos là haut, in pouvo vire la mer et in dessous not ' objectif ...
ouais not' objectif , chéto d arriver par derrière eune espèce d' tourelle in béton qui yavo à mi distance des deux estations
cha devo et' un reste d' chez blockhaus qui jalonotent tout not' littoral
in voyo ché gins marcher l' long d' la plage , et d un coup in dévalo comme des dératés pour atteinte chte fameusse tourelle
par conte , eune fo arrivé su la plache, chéto comme chi l' magie ale éto terminée, in éto pu des coboyes ou des zindiens, faut dire qui yavo des adultes pi d autes jones su la plache et in allo pas passer d'vant eux in faijant semblant d 'ete à bidet ...
nan ,d' la in allo tremper ché pieds dins la mer, même si in avo promis à ché parints qu in y iro pas , bin nan hein manman , i fait trop frod
mais que voulez vous quand qu in voyo qui yavo des paquets d écume, in avo ker déchinte l' long du rivache pour donner des coups d' pieds d'dins , pi raviser aussi c'que la mer ale avo ramené su ché cotes ....
souvenirs souvenirs