ch' est pas si viu qu' cha

ch' est là qu in vo que l'temps, que l' progrès i nous a fait commint dire "rinte normal" des chosses qui y a cor , allez moins d' 15 ans que ch'éto cor sinon pas un reffe, in tout cas in y éto pas si "accro" ....

j' veux parler d' internet ..

j' me souviens qu'min père ,dans les dernieres années des' vie, j' diro à partir de 1995, i sorto régulier'mint ses inveloppes ...

savez y a eu un temps pour tout , y a eu sin temps pour travailler, pi après y a eu s'retraite à 55 ans, mi j a eu la chance , dernier del famile à in profiter, pasque ch'est à partir dech' momint là qui a décidé , ché zautes zinfants étotent majeurs, d' voyager chaque année dans différentes régions de france ...

pi après plus d' 20 ans à voyager, cha ch'est estompé, ou plutot i voulo pu faire des grands voyaches in carette , in tout cas pu trop s éloigner dans l' sut d' la france

alors , quand qui avo del nostalgie, i sorto ses zinveloppes...chéto d' grantes enveloppes in papier kraft, eune pour chaque année du qui yavo été en vagances

asteure in auro fait des milliers d' photos pi des flimes , classé cha dins des fichiers, et hop la belle affaire, in s arpasso cha quand qu in in avo invie

alors que là chéto plus "rudimentaire"...d'dins in trouvo l' itinéraire qui avo emprunté pour y aller, chéto écrit au verso d eune enveloppe qui avo djà servi, in gaspillo pas ch' papier al' mason...

d 'dins in trouvo aussi ché cartes postales acatées en nombe, in tout cas eune pour immortaliser cha indrot du qui zavotent été, min père éto pas un fana d' l apparel photo

yavo surtout ché dépliants récupérés dins ché syndicats d initiatiffe, pi par exempe quand qu in avo visité le gouffre de padirac, bin i avo accroché avec un trombone, ché tickets qu in avo utilisé pour l' visite , chéto touchant ...

et chéto à chaque coup , avec m' mère , comme un voyache dans l' temps, et à chaque fo cha s' termino par deux phrases remplies d' sagesse

"ah cor heureux qu in a fait cha quand qu in a pu l' faire"

pi

"in éto bin hein ...."