ché patinoires d' canivaux
par minloute le, 08/12/2013rue raymond deruy ou rue d anzin comme dijo min père, ch'éto pas m' rue , mais chéto celle que j' préféro
j avo mes camarates qui y habitotent , que che so rue raymond deruy ou ché masons accollées derriere, la rue de denain
y a eu un temps oh mes gins pas si viu qu' cha, qui yavo pas d' tout à l égout, ché cabinets, chéto des fosses qui fallo faire v'nir ch' camion à brin régulier'mint ....
et ch' l io d' vaisselle et d' cuisine , cha parto dins ché caniveaux
rue raymond deruy, et cha m' surpreno toudis, yavo un caniveau non freumé, eune rigole qu in auro pu dire, qui parto del' mason tout in haut et qui dévalo jusqu en bas du coron jusqu à c'grand égout
j' me souviens min camarate y habito au 8 ou au 10 del rue, so presque tout in bas, et cha m ' surprenno toudis d' devoir faire attintion avant d' rintrer as' mason à devoir enjamber ch' caniveau, vu qui yavo souvint de l' io avec del mousse qui arrivo del mason d avant , en fait de toutes cha masons situées en amont
j' me souviens d' sin père qui ralo pasque yavo quequ'fo des bouts d' salate qui flotto, que certains i zavotent jeté tout cha, au lieu del donner à ché lapins ..
l' hiver fallo faire attintion pasque l' devant des masons, cha deveno eune sacrée patinoire
durant l ' nuit l io ale avo gélé, et quand que ché l io des vaisselles et des buées as' deversot, bin cha débordo d' chaque coté del rigole ,et si faijo bin fro , cha gélo par dessus ...
mais mi min plaiji chéto quand qu in allo à l école, d' marcher justemint dins ché caniveaux ingélés, bin sur chéto interdit par m' mère , j avo eu ché consignes " abime pas ché chaussures " etc etc
mais que voulez vous in avo l' plaiji d' marcher d' dins, et d intinte par momint l' glace craquer comme si in éto un peu david croquette qui parcourro les montagnes rocheuses l hiver à la recherche de castors .......
cha ch' éto quand qu in éto vraimint tchiot
mais not' grand plaiji, chéto d' printe s' n élan et d' es' mette d' coté au dernier momint et d' glicher sul' glace sur eune paire d' metes
yavo des espécialistes qui pouvotent glicher comme cha sur plusieurs metes, sans casser l' margoulette à la fin
mais fallo quand meme faire attintion , vu que , savez ché mères , bin as' dijotent tout, alors meme si t'mère ale éto pas là ach' momint là, fallo pas attinte longtimps pour qu ale so au courant ....
surtout si in plus , té rintro avec des godasses trempées, là cha bardo pour tin matricule ...