Monsieur Robitaillé instituteux à Loubet 1

j' vous avo dit que Mr Robitaillé yavo du caractère, j' devro plutot dire qui éto à fond dins sin métier

quand que chéto l' récréation , i discuto avec ché zautes maites, mais yavo toudis un eule à raviser du que cha pouvo "dégénérer" et yavo "l'sifflet facile"

yavo un momint du qui m impressionno vraimint, chéto les leçons de géométrie, non que j' mi distinguo, chéto plutot l' contraire ...

mais j éto impressionné del vire es' servir au tableau d' instrumints d' géométrie d' grante tale, comme l' équerre, la régue, et bin sur ché deux instrumints de torture à savoir le compas et le rapporteur ...

le compas, vinguette,chaque branque ale devo mesurer 50 centimetes, eune grosse pointe d un coté, et d' l'aute un morciau d' craie coinché au bout ............

quand j' voyo que mi j avo djà du mau à avoir un compas complet dins m'trousse, ouais in peut pas et' fort partout , j éto surtout un espécialiste du lancer d' compas, fallo et' discret, et l' lancer d un coup , eune fo que ch' maite avo l' dos tourné, l' planter dins l' plancher sans qui arqué et que cha fasse du bruit ...

autre instrumint de torture, le rapporteur, alors là quand qui a fallu comprinte les degrés , mon diu, j éto comme certains angles, vraimint optus....

mais arvenons à Mr Robitaillé


intègre et droit, exigeant, mais avec un grand coeur, meme si j a "souffert" avec li pasque l' calcul chéto pas min fort, j a l' souvenir des récitations qui nous faijo apprinte et qu in devo illustrer, à nos masons, avec eune photo qu in devro trouver dins des magasines

avec li j a appris des textes de Maurice Carème, Prévert et sin inventaire, Théophile Gautier aussi .....

j'me souviens un coup, véridique mes gins, in devo apprinte par coeur la derniere récitation ,y allo avoir interrogation individuelle, enfin j avo compris cha, mais l' jur arrivé, au momint d' l interrogation, j avo pas bin compris , j' auro du réviser les 6 dernieres récitations ...

in passo chacun sin tour au tablau, in allo l'vire , yavo un dé, j'sais pu si chéto li ou nouzautes qu in devo faire rouler ch' dé, mais si té sorto l' 3 fallo li réciter l' troisieme récitation

j éto pas dins à l aisse, j' diro meme que chéto panique à bord, j éto pas l' seul à pas avoir compris, i n a un qui a pas su réciter, i s a emporté , y a d'mindé si n avo d autes qui avotent pas appris toutes ché récitations, j a pas osé levé l' dogt ...

bref, arriffe min tour, et j a tiré l' 6 , chéto l' derniere, l'seule que j savo,j' me souviens que chéto eune récitation sur l'automne et que m'mère ale avo découpé eune belle photo d arpe avec des couleurs flamboyantes, photo découpée soit dans l' ptit écho d'la mode, mode et travaux, ou la vie catholique , que chéto les 3 magazines qui yavo régulier'mint à la mason

j a l' souvenir d avoir eu un bon point, pasque j' savo ce que chéto eune écuyère
j me souviens des grantes imaches qui servotent à illustrer les cours d' géographie, les falaises d étretat à marée haute, les memes falaises à marée basse

eune carte avec des confluents, des affluents, des rivières et des fleuves ...

pi bin sur et in in éto fiers, des zimaches avec nos fameux zancetres, ché gaulois, avec leu grands casques et leu maronnes à carreaux
que y n a un qui a voulo faire d' l humour , am'mote chéto sin père ou sin frère qui li avo dit, i avo l'vé sin dogt pour dire ach' maite que les gaulois i connaissotent djà les cigarettes, pisque leu femmes chéto les gauloisses
rican'mint dans la salle, et ch'maite qui li passe un savon ach' brave garchon

aut' souvenir , mais j' su pas sur du jour, est ce que chéto l' vendredi après midi ou l' samedi après midi ?

enfin chéto les dernieres heures d' la semaine, consacrées à la bibliothèque

ch' maite i venno dins ché rangs, et cha nous "toucho" d' el vire s assire au coin de ch' pupitre , i allo de l un à l aute d' maniere alphabétique

i récupéro l' liffe emprunté, i d'mindo pas fort à chti qui l avo lu si i l avo eu ker, quequ'fo i d'mindo si in pouvo li faire l' réseumé, i poso des questions su l histoire et bin sur i noto

mais chéto eune autre ambiance, moins solennelle, vraimint proche d' nouzautes

pour nous chéto la fin de la semaine, chéto l'silence dans la classe, soit on commincho à lire l' liffe emprunté, soit on attindo sin tour tranquil'mint ......

avec l évocation de Mr Wacheux et Mr Robitaillé, ja l' souvenir d' instituteux droits, amoureux d'leu traval, et j' do avouer, que ché maites que j a eu après , j a pas eu autant d attach'mints avec eux

y a sur'mint aussi qu en grandissant, in devient un peu moins maléape, un peu plus rebelle...

ptete aussi que ché maites que j a eu après , i zétotent plus jeunes et chéto pas la meme façon d enseigner cha ch'est sur ...........

allez savoir....