le budget

avec un père magasinier qui a gardé jusqu à la fin d' sa vie des clous amalgamés, rouillés, mais qui voulo pas jeter pasque " cha pouvo servir"
et pi eune manman qui s occupo bien du ménache, sur que ché budgets à la mason i zétotent bien tenus.....

j a artrouvé dans un agenda "dunlop" d' 1953, eune partie des dépenses du mois de juillet

ce que j a trouvé interessant ch'est l' détail des dépenses ...

chaque jur y a du lait , soit pour 46 francs, soit pour 62 francs

j' sais pas à quo cha pourro corresponde asteure, vu qu in plus in a passé entre temps aux nouveaux francs , pi à l euro , sans compter l' cout d'la vie et les salaires qui ont bin cangé

chaque jour y a ch' pain , in n a pour 136 francs, 137 francs 116 francs, c' qui m'fait dire que ch'pain i devot ptete et' pesé avant d'ete vendu ?

à part ch' lait et ch'pain, y a la viante qui arvient chaque jour

là cha varie, 236 francs un jours, 355 un aute, 375 francs un aut'jur...

aut' "poste" , la coopérative, am'mote que ch'éto pas cor les magasins coop, vu qu on parle du début des années 50

chéto ptete la coopérative qui avo été monté par mononque , coopérative du qui zacatotent des marchandisses pour les arvinte aux particuliers

tiens j a vu qui yavo des achats réguliers, d environ 50 à 70 euros à mon chez Nen, savez ch' magasin rue anatole france, pas loin d'chez vanghelder, pas loin d' la framassie du qui avo bonnier et pi roland ch' l imployé...

après y a des zachats exceptionnels, pour les zinfants

le 25 juillet, i n a pour 2500 francs d' bottines

et pi le 19 juillet ch'est marqué "voyage 355 francs colonie 1800 francs"

le 22 juillet , fournitures colonie 725 francs

un peu plus loin le 29 juillet y a cor le "poste" colonie 200+500 soit 700 francs

min père i faijo l' total par semaine du 19 juillet au 22 juillet , dépenses 1479 francs

du 23 au 27 juillet dépenses 1954 francs

am'mote que l'"quinzaine" ale quéyo en fin d' mo, pasque entre le 28 et le 29 juillet, y a pour 2058 francs d' dépenses

j a armarqué que chaque semaine in acato eune fo voir 2 fois des pétotes