la garderie de La Napoule

sur facebook , étant bruaysien , j' su abonné à "si tes bruaysiens" , ch' est bien pasque ché gins i rouvent leu tiroirs et i arsortent d' vielles photos

j a eu l' bonne surprisse d' arvire eune photo d' la garderie d' La Napoule, oh si vous saviez l' coup au moral que cha m a fait ...

pasque j avo pas arvu ou imaginé ch'te batimint depuis juste 50 ans ....

que mauvais souvenir pour mi, ch'est l' premier coup que j a été abandonné par mes parints et mes soeurs ....

i parait mais j a pas grinmint d'souvenirs, qui paro que j' éto un espécialiste du dégobillache en autocar


parait qu in avo été juste avant à monaco et que rin que pour mi yavo eu un arret supplémentaire pour vider mes boyaux .....


j' sais qui zavotent accroché sur un bouton d' min polo, un morciau d' persil, chéto sinsé arreter min vertiche automobilistique ....

mais cha avo pas marché

donc j' me souviens vag'mint que mes parints i m en avotent parlé qui zallotent partir eune pitite journée avec mes soeurs pour aller visiter valberg

que ch'éto bien loin dans la montane, à l interieur des terres, que l'route ale allo pas arréter d' tourner , ch' car d' berloquer, que l' route ale passo juste à coté d' viraches vertigineux ...

bref, j a du comprinte que meme pour eux, chéto pas facile pour eux d y aller, dins min fort intérieur j 'em dijo qui zaurotent pu rester ichi avec mi .......

j' me souviens cor quand que m' mère ale m i a laissé, j'cro que ja du braire plus souvint qu à mon tour, j a un souvenir terripe d' la sieste d' l après midi, m ' artrouver comme cha dans eune champe dins l' noir à 4 ans, ABANDONNE que j éto, allez pas braire après ...

j avo du tel'mint braire , que j ' m a artrouvé à la fin à coté d eune des monitrices , en dehors d' la sieste et qu ale m avo pas ker pour cha ...

la journée mon diu, ale m a semblé bin longue,interminape, que meme quand que m' mère ale est arrivée,ch'éto comme chi ale éto partie tro s'maines ...

"cha a été" qu ale a du d'minder à ché monitrices, j a l' vague souvenir qui a pas eu grand enthousiasme, in tout cas mi j' su vite arparti avec m' mère et ale m a donné ach'momint là, savez ché pochettes qu in donne quand qu in acate des cartes postales, et d'dins y avo eune toute tchiote pipe in bo, avec eune cordelette verte

mais la napoule , cha a été aussi la caleur,l' tour in pédalo, l' io transparente, et caute, d' la couleur du canard wc , ch' fu d artifice sur la baie vers cannes, ch' musée de monaco du qui avo des phoques j' min souviens pi la garde monegasque avec leu capio colonial et surtout les vacances pour toute la famile

et j'diro surtout pour ché femmes, m' mère quand qu in parlo d' la napoule ale dijo toudis en premier, "in avo pas à faire à minger , pi , in plus in s' faijo servir"