Tricot
par maurice devos le, 15/08/2015j'ai comminché à tricoter j'avos in dizaine d'années , j'ai tellemmint im,,,,bété em'mère qu'al a fini par em'monter in dizaine ed'points d'su in aiguil , et cha a été un long parcours ed'tricoteux qui démarrot
souvint j'appelot em'mère ou in soeur in dijant
"j'ai perdu un point" pindint in paire ed'fos cha a été , mais au bout d'in momint l'réponse chetot : "d'ebroule te"
c'qui fait qu'à la lonque ch'faijos plus attintion , et ché comme cha qu'j'ai , in faijant attintion qu'j'ai comminché à faire mes premiers points à l'invers , et p'tit a p'tit à faire min premier cache nez "tout in point d'mousse bin sur" yetot pas cor question à ch'te stade ed'faire un si long tricot avec des points à l'indrot et des points a l'invers
et pi tout duchemint j'in su arrivé à apprinte chés augmentations , chés diminutions , à faire des torsades , et pi à faire des cauchettes mais à 4 aiguils, et la mes gins in cauchette ché pas comme un tuyau qui va ed'pas d'sous sin genou al pointe ed'ses ortels , nan nan , ché tout un mesurage ed' chés différents diamête d'ech'genou jusqu'a ses ortels , avec augmentation et diminution pour bin printe el forme d'el gampe , et avec derrière el cauchette "comme a chés bas d'femme" in line in point d'riz
ché crevant d'faire du tricot , alors jusqu'à d'main j'irai sans cauchettes
pour commincher , apres chés mesuraches "chétot l'boulot d'em'mère" fallot faire in bordure ed' 5 a 10 cms" un point à l'indrot , un point à l'invers , ou deux points à l'indrot , 2 points à l'invers , avec cha yavot pas b'soin d'élastique
apres chétot tous points à l'indrot , sauf pour derrière el cauchette , yavot ch'te fameusse line ed'point d'riz et la chétot un point à l'indrot un à l'invers , cha faijot in line bin droite "si in s'trompot pas" jusqua ch'début d'ech'talon , qui étot fait par em'mère , trop compliqué pour mi , et la j'min rappele pu
j'ai continué à tricoter longtemps après min mariache chétot quasimint in passion pour mi , et in faijot cha insanne avec em'femme "in parle toudis tricot bin sur"
j'ai fait des gants pour mes infants , j'ai aussi fait du canevas , mais par la suite j'ai du abandonner pour faire tout c'qu'yétot min boulot d'chef ed'famil , ché à dire intretien d'el mason , réparation voiture , la j'avos mes mains din l'cambouis