Le 3 de Bruay-en-Artois
par GJD le, 19/10/2015Bonjour tertous’
Ché l’premièr’ fos qu’éj j’interviens sus' sit’ et j’dos dir’ qu’éj sais pas trop par quoi commincher. Faut dir’ que j’y sus arrivé par hasard pasque j’cachos après l’nom d’in’ rue d’Bruay. Seulmint v’la, Bruay in Artois, à cht’heur’, cha n’exist’ pu ; té peux toudis taper Bruay en Artois din tin moteur sur internet et t’auras toudis Bruay la Buissière. J’m’escus’ mais mi j’sus né à Bruay in Artois et pas ailleurs. Y pous’tent minme el’ vice jusqu’à canger tin lieu d’naissance su’ t’carte d’identité.
Après cha y vindront nous dir’ qui faut pas falsifier des documints officiels. Et vlà qu’j’ariv’ sul forum d’histoires de ch’tis. Comme j’ai eu du plaigi à m’rapp’ler des trucs qui étotent camuchés din m’mémoir’ et qu’in plus on m’a dit qu’à Bruay y zont perdu les archif’s d’ell’ vill’ (y sont arnéqués quand minme si ché vrai !), j’ai pinsé qu’in s’rapplant chacun s’qu’on sait incor’ d’sin coin, un pourrot arfair’ un’ sort’ d’histoir’ vivant’ et vécue.
Té peux toudis essayer d’artrouver un plan d’Bruay avec chés rues d’avant, macache, rin du tout ! Alors j’ai décidé d’vous parler d’min quartier d’abord. Ej’ sus né au 3 mais comm’ ché assez grand comm’ coin, j’vas l’décopé in 4 pour miu situer chés rues (rassurez- vous, j’vas joint’ un dessin qu’éj vas faire d’min coin. Si on prind l’boulvard Basly comme axe vertical et l’ rue Desseilligny comme axe horizontal pour fair’ in’ croix, on s’artrouv’ avec 4 quartiers qu’éj vas numéroter ainsi pour miu vir ed’ quoi on pale.
Premier quartier (A) un haut à gauch’ j’diras qu’ché ch’ti d’el l’ fosse 3 avec, un bas el l’ rue Desseilligny, ch’morcieau qui va d’ech boulevard Basly à l’fosse (rue Daguercar), et pi ch’côté gauch’ d’el l’ fosse rue Daguercar jusqu’à carrefour d’éch sintier d’Pernes à gauch’, el l’ rue du corps du bois devin, à droit’ el l’ rue d’Pologne et pi la fin d’éch boulevard Basly. Chez din ch’coin là qu’y a éch’ cim’tière du 3.
Deuxième quartier (B): in bas ; l’rue Desseilligny jusqu’à rue d’La Cavée ; à gauch’ ch’bouleverd Basly, in haut, l’rue d’Pologne et l’rue d’Philippeville et à droite el l’ rue d’La Cavée
Troisième quartier (C), in bas à l’rue Marmottan avec l’églis’ Saint Martin, à gauch’, l’boulevard Basly, in haut l’rue Desseilligny à droite el l’ rue d’la Cavée jusqu’à ch’quémin latéral.(éj’mets ed’ din el l’ rue d’La Martinique, l’rue Fort de France et pi l’rue Sainte Lucie.
Quatrième quartier (D): In bas, l’rue d’Amont ; à gauche, l’rue Gaston Blot avec din prolong’min l’rue Daguercar jusquà l’rue Desseilligny ; in haut l’rue Desseilligny, à droite ch’boulevard Basly.
Bon vlà, ché dit, cha dot vous parait’ dur à comprint’ quant’on n’est pas d’éch coin là mais avec mes 4 dessins qui vont vénir, cha s’ra pu simp’ vous pouvez aussi aller vir sur internet pour vous artrouver mais j’vas parler d’rues qu’y sont pu là et d’aut’s qu’on cangé d’plache.