l' moto d'min père
par GJD le, 23/10/2015L’moto d’min père
Vous s’ouv’nez certainemint des mobylettes bleues et oranch’s motobécane. Y est arrivé un momint édu qu’j’ai eu invie dé n’avoir un’ aussi ; deux d’mes camarats y n’avotent un’, alors pourquoi pas mi ? Et ben… pasque ! J’ai donc continué à rouler su l’vélo d’un frère.
Min père il avot fait d’el moto. Quand j’étot jône il avot un’ Terrot marron pi après un’ verte. Et vénu l’momint édu qu’il a passé sin permis auto (il avot pu d’cinquante ans). Quand il l’a eu, il a acaté un’ 4cv Renault d’occasion, et s’moto al est restée là din l’buanderie.
Un jour qu’mes parints étotent partis, m’est arvénu l’goût d’essayer, pas l’mobylette, mais l’moto.
J’la donc sortie din l’cour, mis su s’béquille, passé un coup d’chiffon ed d’seur et, ben qu’al avot pas roulé d’pis ben longtimps, après tros quat’s coups d’kick, vla qu’al démarre. Tout contint, éj monte éd d’sus, sors din l’rue que j’déchinds tout duchemint car j’a bieau tourner l’poignée d’gass, al accélère pas.
J’pass’ devant un homm’ qui, li, avot un’ grosse moto. Y m’dit : « t’as ouvert ch’l’arrivée d’air ? Quoqu’ cha n’est ? » Y vient vers mis, trifoulle deux s’contes éch moteur et vlà qu’el moto al s’invole !
j’arrif vite in bas d’el rue, j’tourne à droit’ din l’rue d’La Cavée et cha va d’plus in plus vit, chés freins y march’tent pas !
J’pass’ d’sous ch’pont d’el rue Desseiligny et j’arrif’ à toute vitesse din j’virach’ d’amon Raymond Dussart ch’débit d’tabac, que, pour pas kher, j’dos printe in montant su ch’trottoir. Su ch’trottoir, devin mi, un’ Traction à moitié à bidet su l’route et ch’trottoir et just’ derrière chés marches de ch’magasin d’tapisserie.
Vinguette ! J’sais pas commint qu’j’ai fait mais j’sus passé intre l’Traction et ch’mur tout in frolant chés marches. Me v’là d’vant amon Deruy din ch’virach à droite pour déchint’ el côte éd d’La Cavée.
Là, tout drot su l’plach’ in terre battue in haut d’el rue d’la Martinique. J’arrif’ à tourner devant ch’café qui avot là, j’arviens sur mes pas et, comme el’ moto al veut bien enfin ralentir éj’peux m’arrêter.
L’trouniette qu’j’ai eu, vous n’avez pas idée. Du coup, j’ar su arvénu tout duchemint à l’maison, armis l’moto din l’buanderie du qu’al n’est pu sortie que pour ête arvindue.