Les jardinsch' cassq' américain
par GJD le, 23/10/2015Ch’cassq’ américain.
Din l’rue d’La Cavée, tout juste après ch’café à mémée Jarette, y avot un’ pétit’ maison avec sin gardin su l’coté, qui allot jusqu’au début d’l’impass’ Devise. Ch’tot un viu qui étot là tout seu.
Quand on passot, on l’véyot souvint din sin gardin. Mais y avot surtout un truc qui nous intéressot, chétot un cass’ éd d’guerre américain, comme on vot din chés films, accroché à ch’grillach’ d’sin poulailler.
Quand t’es tchiot, cha t’fait busir. Té t’vos ramper din l’bidoulle avec tin fusil su l’dos, ché balles qui siff’tent par d’sus ch’cass’. Naturellemint, té ganes à la fin.
On allot juer din un vielle Traction stationnée au début d’l’impass’ Devise, jus’ à côté d’amon Deruy. In ar’passant, ché toudis ch’cass’ qui nous intéressot. C’qui fait qu’un jour on s’a décidé à aller l’print’ sans rien d’mander. On a été très surpris d’el grandeur de ch’cass’.
Quant’ on l’mettot su s’tiête, in véyot presque pu rien pasqu’y déchindot d’vant tes yus. Faut dire qui n’avot pu rien d’din pour s’protéger d’el férale. Ch’ta ch’ti qu’aurot voulu l’mett’.
On a jué un momint avec épis après on l’a arjetté din ch’gardin d’éch viu.
Ah, j’allos oublier d’dire un pétit détal. Y avot deux pétits trous derrière ch’cas. Des trous d’clous pasqu’y avot un bout d’bos cloué d’sus qu’on avot du inl’ver. Un grand bout d’bos, un manche quoi, pasque ch’viu y vidot ses cabinets avec.
