Histoires de France

si j' devo garder que chinq lives, j' su sur que j' gardero "Histoires de France"
zavez armarquer que y a un "s" à histoire, in fait ch est un liffe pour la jeunesse paru chez Hachette en 1966

cha raconto des pages de l histoire de France, par des récits qui mettotent toudis en scène un jeune ou eune jeune éfant

par exempe : un garchon qui participe à la chasse royale à Chambord du temps de Francois premier, un aut' qui rencontre henri quat', un qui participe comme page à un tournoi de chevayiers du temps de charles chinq, etc etc


j a un grand souvenir d' "Avaric la ville des forgerons", jel connaisso par coeur, comme ch' gamin là, un fils d' gaulois, j' me lévo tot avec li pour accompagner sin père à Avaric, la future ville de Bourges, et j éto toudis contint qu à la fin d' l histoire i arvienne à sin villache , avec un coutiau de chasse forgé d'vant li , cadiau d' sin papa ...

un aut' chéto un jone qui s occupo des tchiens de louis onze, pendant ses voyaches à travers la france

et bin sur , chti d un jeune garchon qui éto parti au canada, et qui s' batto conte ché zanglais et qui mourro à la fin d' l histoire i mourro en 1758 lors de la défense du fort carillon ....

té sur m'man qui est mort ? que j' dijo am' mère, mi assis d' travers d'vant l' grante tape del cuisine , eune main pour arténir m' tiete ( si min père i s'ro passé ach' momint là i m auro dit "arprint un mete" )

pasque ch' liffe là, yavo de très belles illustrations certes, mais ch'est pas pour cha que jel' gardero toudis, ch'est que chéto m' mère qui m in faijo la lecture.....

chéto toudis l' meme rituel, fallo avoir fini ses devoirs, j' pinse qu in devo et' l' jeudi après midi , m' mère ale avo mis sin tricot d' coté, ch'cat i éto incrinqué dins l' corbele du qui yavo ché pelotes , devoir terminé, là j avo dro ch' jur là à c'qu ale m' raconte eune histoire, ale éto sure que cha sero eune histoires de chte liffe ......

chéto toudis les memes que j' choisisso, ch' jone gaulois qui allo à avaric, ch' jone qui mourro au canada, eune aute qui s' passo au temps de charlemane, deux zautes au temps des chevayiers
et ch' est m' mère qui m' raconto cha, j' la raviso m' lire l histoire, j' el connaisso presque par coeur , mais ch'éto rin que pour l' plaiji d' l acouter m'el raconter , d intinte s' voix cantante

pas grand cosse d important, un liffe comme un aute, mais qui pour mi est à tout jamais rattaché à m' mère et comme diro l aute , cha a pas d' prix ...