la rue de Montataire

quand qu in est tchiot, j habito rue Leverrier, m a fallu un momint pour savoir que ch' éto un savant

in plus j a cru jusqu i a pas longtemps que chéto la rue Leverrier, in fait ch'éto la rue Le Verrier

pasque "ch'fameux" Le Verrier, Urbain d' sin prénom, chéto un astronome et que ch'est li qui avo découvert la planete Neptune
am'mote que cha devo pas et' si important qu' cha pisque in a donné sin nom à eune rue du qui a pas plus d' eune dizaine d' masons accolées d un coté et 2 masons su l aute coté, et qu in plus as' termino en cul d' sac .....

mais ch'est pas l' sujet d aujourd hui, aujourd hui in va parler d' la rue de Montataire .


ch' te rue, qu ale mesure 197 metes, oh croyez pas que j a sorti min décamete d arpenteur , nan ch'est précisé sul' site stretdir org.........

ch' te rue , mi quand que j éto tchiot j éto persuadé que ch'éto nin la rue de Montataire, mais la rue de "monte à terre"

ah zallez dire, et j' vous vo v' nir d' loin mes gins, minloute y éto babache

cha j' peux dire "certain'mint" mais j' va plaider "non coupape" ......

pasque si vous étiez in bas d'la rue, donc rue de Fourchambaut (cor un nom pas facile ), bin fallo vraimint avoir besoin d' passer par la rue de Montataire pour l' printe ......

vallo presque miu passer par la rue raymond deruy, plus long , bin plus long mais au moins cha monto régulier'mint

nan la rue de montataire, ch'éto un sacré raidillon, fallo pas oublier d' mette l' frein al' carette sinan té l artrouvo tout in bas rue Florent Evrard .....

et quand que tel' monto chte rue, té baisso t' tiete, comme un courreur, t éto contint d arriver in haut , d ' in printe chinq , comme on dit et d' arpartir ensuite ...

donc "rue de monte à terre" , ale auro pu s appeler comme cha ....